Çempionlar liqası

“Qarabağ”dan canlı yayım açıqlaması: “Bu sual birbaşa telekanallara ünvanlanmalıdır”

25.07.2018 , 14:24

Xəbər verdiyimiz kimi, “Qarabağ” bu gün Çempionlar Liqasının 2-ci təsnifat mərhələsinin ilk oyunu çərçivəsində səfərdə “Kukesi” ilə qarşılaşacaq.

Ancaq Ağdam klubunun Albaniya təmsilçisi ilə oyununun Azərbaycan teleməkanında canlı yayımı sual altındadır. “Kukesi” – “Qarabağ” matçının TV-də canlı yayımlanmayacağı haqda xəbərlər isə futbolsevərlər arasında haqlı narazılığa səbəb olub.

Məsələ ilə bağlı “Qarabağ”ın mətbuat xidmətinin rəhbəri Nurlan İbrahimov Komanda.az-a açıqlama verib. Klub rəsmisi oyunun canlı yayımlanmaması məsələsində günahlarının olmadığını dedi:

“Bildiyiniz kimi, təsnifat mərhələlərində yayım hüququ ev komandasında olur, yəni ev sahibi olan klub satır yayımı. Bildiyimə görə, bizim idman kanallarımız yayımla bağlı qarşı tərəfə müraciət ediblər, onlar da oyunu yayımlamaq istəyən telekanaldan müəyyən məbləğ tələb ediblər. Bu sual birbaşa telekanallara ünvanlanmalıdır. Bizim bu məsələyə birbaşa müdaxilə etmək şansımız yoxdur. Bu məsələdə klub ən son günahlandırılmalı olan tərəfdir. Klub nə edə bilər bu məsələdə?”

Yeri gəlmişkən, biz daha əvvəl “CBC Sport”un baş redaktoru Şəmsəddin Abbasovla da yayımla bağlı əlaqə saxlamışdıq. Şəmsəddin bəy Komanda.az-a açıqlamasında bunları demişdi:

“Biz Albaniya tərəfi ilə ilk gündən danışıqlara başlamışıq. Amma bizim təklifimiz siqnalların barter edilməsidir. Albaniya tərəfi buna razılıq vermir. Hazırda danışıqları davam etdiririk. Amma əks tərəfə barterdən başqa bir təklif irəli sürə bilmirik. İstənilən halda, müsbət cavab aldıqda bu haqda dərhal “öz facebook” və internet səhifəmizdə məlumat verəcəyik”.

“Kukesi” – “Qarabağ” matçı saat 21.00-da start götürəcək.

Son yazılar

Yuxarı