Topaz Premyer Liqasında V turun “Qarabağ” – “Kəpəz” (2:0) oyunundan sonra təşkil edilən mətbuat klonfransında qonaq komandanın baş məşqçisi Şahin Diniyev jurnalistlərin suallarını cavablandırıb.
O, əvvəlcə matç barədə fikirlərini bildirib:
"Qarabağ"a qarşı oynamaq mümkünsüzdü. Rəqibin ən yaxşı oyunçuları meydanda idi. Biz də gənclərə şans verdik. Taktiki cəhətdən uşaqlar yaxşı oynadı. Belə oyunlarda kiçik səhvlərdən komandalar istifadə edirlər. "Qarabağ" da bizim səhvlərimizdən istifadə etdi. İkinci hissədə pis oynamadıq. Zonaları bağlayıb hücuma keçmək istədik, bir neçə epizodda bunu bacardıq. İstədiklərimiz olsa idi, heç-heçə olardı. Ancq bunlar mülahizələrimizdi. "Qarabağ" güclü komandadı. Öz futbolçularıma gəlincı onlardan razıyam. Oyunçularım vuruşdular. Səhvlərimiz oldu, ancaq sınmadıq, sona qədər mübarizə apardıq. Bizə bir qədər vaxt lazımdı və əfsuslar olsun ki, bu vaxtda bizə xal verilmir. İnkişaf edirik, artıq "Kəpəz" hücum futbolu oynayır. Xallarımız gələcək, sadəcə dözmək lazımdı".
– Bu gün bəzi futbolçuların mövqe dəyişikliyi var idi. Nə ilə bağlı idi?
– Tural Rzayevin dəyişikliyi standart vəziyyətlərlə bağlı idi və bunu da labüd hesab edirəm. Bu dəyişmələr yalnız standart üçün nəzərdə tutulub. Oyun zamanı dəyişiklik olsa idi, "Qarabağ" kimi komanda üçün faciə idi.
– Məğlub olan komandaların məşqçiləri komandalarından razı qalırlar. Bu son zaman dəb halını halır. "Kəpəz"in bütün hücumları oyundan kənar vəziyyətə düşürdü. yaxşı olardı ki, komandanın əsas problemi haqda danışasız. Razıyam, "Kəpəz" yaxşı hücumlar etdi, ancaq hər dəfə oyundan kənar vəziyyətə düşürdülər. Bu problem nəydən qaynaqlanır?
– Peşəkar sualdı. Bunun səbəbi oyunçuların dəyişməsi olub. Xəttlər arası boşluqlar, futbolçular arasında anlaşılmazlıqlar olur. Fərdi bir-birini başa düşməyən oyunçular xəttlər arasında əlaqə zəif olur. Furbolçularımdan razıyam, çünki onlar vuruşdular. "Kəpəz" iddialı komandadı. Azarkeşlərimiz yaxşı futbola layiqdi. Mən utanıram "Kəpəz"in bu yerlərdə olmasına. Problemlər çoxdu. Bəzi futbolçularım tamamilə fərqli yerlərdən gəlib. Futbolçuları bir-bir sayanda görərik ki, nə cür fərq var. Ötən ilki, heyət arasında çox fərq var ki, bu da boşluqlar yaradır.
– Deyə bilərikmi ki, komanda elə potensialına uyğun yerdədi?
– Elə deməzdim. Bizim "Zirə" ilə uduzduğumuz oyunda 61% topa nəzarət var idi. Bəzi oyunlar bizim potensialımız üçün deyil, amma bunu hamısına aid etmək olmaz. Hazırda komandanın formalaşması bu problemə gətirib çxıarır və buna görə də xallar itiririk. "Neftçi" ilə oyunda xal götürdük, ancaq bəyənmədim. "Zirə" ilə oyunda da topa sahib olmaya baxmayaraq razı qalmadı. Ancaq son iki oyunda hər şey qaydasında idi. Bunu deyə bilərəm. Elə mövqelər var ki, sonuncu dəqiqəyə qədər şübhələrim qalır. Bilirəm ki, səhvlər edəcək. Hər mövqedə böyük çatışmazlığımız var.
– "Kəpəz" rəhbərliyinə necə çatdırmaq olar ki, komandanı formalaşdırmağa daha tez başlamaq lazımdı?
– Məşqçinin iki yaxşı səbəbi olur: hakim və rəhbərlik. Ancaq mən özümü günahlar saymışam. Mən bu ağır yükün altına girmişəm və bu çətinlikdən qaçmaq fikrim yoxdu ancaq bizdə vəziyyət yaxşı deyil. Digər komandalarla müqayisə olunmazı. Mənim büdcəm olsa, 70 minlik (illik) futbolçu götürərəm, daha yaxşı oyun göstərərəm. Ancaq mən gəclərlər oynayıram. Mən də rəhbərliyi günahlandıra bilmərəm. Onlar da komandanın uğurunu istəyər. Bütün bunlarda 51% günah mənimdi. Nə varsa baş məşqçinin günahıdı. Rəhbərlikdən narazılıq edə bilmərəm.
– Kərimi çox istəyirsiz, yoxsa Coşqunu?
– Heç kimi, səni çox istəyirəm.
