Artıq çempionatımızda ənənəvi olaraq verilən ayyarımlıq qış fasiləsinin son günləri yaşayırıq. Hər halda, sağ olsun PFL bizim klubların fiziki, maddi və psixoloji vəziyyətlərinin ürəkaçan səviyyədə olmadığını nəzərə alaraq komandaların yenilənmə çalışmaları apara bilməsi üçün həmişə belə məsələlərə xüsusi həssaslıqla yanaşıb. Hər nə qədər hiss olunmasa da, bu müddətdə bizim klublarımız mövsümün ikinci yarısına hazırlaşmalı, heyətini yeni transferlər gücləndirməli idi.. Faktiki olaraq, müəyyən qədər “Qarabağ” və “Qəbələ” istisna olmaqla heç bir klubumuz bu müddət ərzində səmərəli fəaliyyət yaddaqalan olmadı. Biz də öz növbəmizdə qələm əhlindən olan həmkarlarımızla əlaqə saxlayıb, sözügedən məsələ haqda fikirlərini öyrəndik.
Səxavət Qurbanov (idmanxeber.com saytının baş redaktoru): “Məlum hadisələrdən sonra yalnız bir neçə klub xaricdə təlim-məşq toplantısına yollana bildi. Digərləri isə Bakıda hazırlıqlarını davam etdirməli oldu. Belə deyək, təbii ki, Antalyada təlim-məşq toplantısında olan klub Bakıda hazırlıq keçən klubdan istənilən halda abir addım öndədi. Bunu sırf güc baxımından yox, hazırlıq baxımındna nəzərdə tuturam. Hər halda "Qarabağ", "Zirə" "İnter", "Qəbələ" və "Sumqayıt" Bakıda qalan XL, "Neftçi", AZAL, "Kəpəz"dən fərqli başqa ölkənin klubları ilə qarşılaşdı. "Neftçi" misal üçün AZAL-la CBC Kubokunda üz-üzə gəldi. Bu artıq bezdirici məqamdı. İstər futbolçular, istərsə də, azarkeşlər baxımından. Bununla təbii ki, komandanın tam olaraq nəyə nail olduğunu aydınlaşdırmaq çətin olar. Düşünürəm ki, "Qarabağ" istisna olmaqla heç bir komanda ikinci dövrəyə hazır deyil,. Yoxlama görüşlərindəki nəticələr, sərgilənən oyun bunun isbatıdı. Hardasa qismən "Qəbələ"ni və "İnter"i də bu siyahıya əlavə emtək olar. Ancaq onlar da istənilən səviyyədə deyil. Konkret olaraq "Qarabağ" xaric digər 9 komanda 2-ci dövrəyə hazır deyil.”
İbrahim Cəfərov (futbolxeber.az saytının baş redaktoru): “Ümumi olaraq, 10 klubun hazırlığını təbii ki, yaxşı qiymətləndirmək olmaz. Çünki əvvəlki illərdən fərqli olaraq cəmi 5 klub Antalyaya yollandı. Üstəlik, həmin klublardan birində də yol pulunu futbolçular özləri ödədilər. Aydın məsələdir ki, klubların qış hazırlığının ideal səviyyədə olmamasında maliyyənin rolu var. Lakin bəzi klubların da xəsislik etdiyini düşünürəm. Ən azından “Neftçi”nin qış hazırlığını 9 ildən sonra vətəndə keçirməsi birmənalı qarşılana bilməz. “Qarabağ”, “Qəbələ”, “İnter”, “Sumqayıt” və “Zirə” artıq digərlərindən 1 addım öndədirlər. Bu gün “İnter” “Verder”lə, “Qəbələ” “Sürix”lə, “Sumqayıt” “Sepahan”la oynadığı halda, “Neftçi” MOİK və “Şərurspor”la qarşılaşır. Ölkədən kənara çıxmayan klublar hər nə qədər əsas gətirsələr də, xaricdəki toplanışın yerini heç nə vermir. Hazırlıqla yanaşı, qış fasiləsində transferlər də mühüm rol oynayır. Burada isə “Qarabağ” hələ ki digərlərini tam qabaqlayır. Uzun sözün qısası, hazırlıq baxımından Premyer Liqa təmsilçilərini 3 hissəyə bölmək olar. Antalyaya gedən “beşlik”, “Neftçi”, “Kəpəz” və AZAL-ın yer aldığı ortabablar və qışda çox böyük problemlər yaşayan “Rəvan” və “Xəzər Lənkəran”. Hazırlıq prosesinin klubların çıxışına, nəticələrinə birbaşa təsir göstərəcəyi isə şübhəsizdi.”
Sərxan Musalı (“Futbol+” qəzetinin əməkdaşı): “Maliyyə probleminə görə bu mövsüm əksər klublarımız toplanışı ölkə daxilində keçdi. Belə bir vaxtda "CBC kuboku" həmin klublar üçün göydəndüşmə oldu. Oyun praktikasından əziyyət çəkmədilər. Ancaq Antalyadakı şəraitlə Bakıdakı şəraiti müqayisə etmək olmaz. Həm iqlim, həm də rəqib sarıdan Türkiyəyə səfər daha münasibdi. Bu baxımdan "Qarabağ", "Qəbələ", "İnter", "Zirə" və "Sumqayıt"ın başqalarıyla müqayisədə bir addım öndə olduğunu düşünürəm. Amma "Qəbələ"nin cəmi 3 oyunla kifayətlənməsi mənə çatmadı. Məncə, qış fasiləsində minimum 4-5 oyun keçirmək lazımdı ki, həm yenilər komandaya uyğunlaşsın, həm də əyər-əskikliklər ortaya çıxsın. İstənilən halda, Türkiyədə toplanış keçən klubların daha hazırlıqlı olacağını düşünürəm.”
Əli Sahib (fanat.az saytının baş redaktoru): “ Bu ilki qış təlim-məşq toplanışı əvvəlki illərə nisbətən daha səmərəli keçdi. İnanıram ki, bundan sonra tamam fərqli futbol görəcəyik. Yaxşı ki,Elxan Məmmədov Ramin Musayevin Azərbaycan çempionatındakı hegemonluğuna son qoya bildi. Növbəti hədəf Rövnəq Abdullayevdir ki, onu da sıradan çıxara bilsələr əla olar. Məmmədovun və havadarı Elşad Nəsirovun bizə böyük sürprizləri olacaq. Ola bilsin ki, gələcəkdə ümumiyyətlə, təlim-məşq toplanışları keçirilməsin. Elxan bəy, savadlı insandır, müasir texnologiyanı futbolumuza tətbiq edə biləcək yeganə kadr odur. Ola bilsin, futbolçularımız gələcəkdə topsuz futbol oynasın. Canyanalıq budur. Yoxsa Ramin Musayev “bacıoğlu” deyə-deyə futbolumuzu məhv etdi. “
İlkin Sultanlı (futbolpress.az saytının əməkdaşı): “Bu mövsüm 5 klubumuzun təlim-məşq toplanışına getməsi, "Xəzər Lənkəran" və "Neftçi"nin isə ölkədə qalması Premyer Liqada vəziyyəti dəyişdirə bilər. Adını çəkdiyim son iki klubun transfer siyasəti də heç ürək açan deyil. Digər 3 komanda – AZAL, "Rəvan", "Kəpəz" heyətlərini kifayət qədər güclü futbolçularla yeniləməyiblər. Demək olar ki, ikinci dövrədə də eyni ssenarili çempionat izləyəcəyik. Lakin "İnter"də rəhbər dəyişikliyi çempionatımızı daha da qızışdıra bilər. Komanda 4 yeni transfer edib və həmin futbolçular çox yüksək keyfiyyətlətərə malikdirlər. Sözsüz mövsümün ən yaxşı komandası olan "Qarabağ" fasilədən sonra üstün oyun nümayiş etdirəcək. Rahidin və Muaremin komandaya gəlişi, Qurbanovun Pupondan canını qurtarması komandanın oyununda yüksəlişə səbəb olacaq. "Qəbələ"də isə işlər biraz fəsaddır. Komandanı bir sıra oyunçular tərk edib, amma hələ də sanballı transfer etməyib. İkinci dövrə başlayana kimi hücum xəttindəki boşluğu aradan qaldıra biləcək futbolçu alsalar, çempionluq uğrunda mübarizəni davam etdirə bilərlər. "Xəzər Lənkəran"da vəziyyət kritikdir. Komandada hər şey sual altındadır. Cənub təmsilçisi bəlkə də problemlər əlindən düzəməlli məşqlər də keçirə bilmir. Klub bu heyətlə ilk səkkizliyə düşə bilsə, böyük naliyyət əldə etmiş sayılar. "Neftçi", "Zirə", "Kəpəz" hələlik öz stabil heyətlərini qoruyan 3 komanda. Hər birinin qarşısında duran əsas məqsəd yəqin ki, Premyer Liqanın 4-cü pilləsində qərarlaşmaq olacaq. Sözsüz "Zirə" və "Neftçi"nin əsas hədəfi ölkə kubokunu qazanmaqdır. "Kəpəz" isə stabil oyunu ilə rəqiblərinin başını ağrıtmağa davam edəcək. Mənim üçün 2-ci dövrədə "Sumqayıt" və AZAL-ın çıxışları maraqlı olacaq. "Kimyaçılar" Antalyaya getməklə Avropa Liqası hədəflərini açıqlamış oldular. Orada yaxşı komandalara qarşı yoxlama oyunu keçiriən Samir Abasovun yetirmələrinin oyununda irəliləyiş his olunur. "Təyyarəçilər" isə ilk dövrənin sonundakı yüksəlişi davam etdirərək ilk altılıqda qərarlaşmağa çalışacaq.”Rəvan"da isə durum gərgin olaraq qalır. Çox böyük ehtimal komanda bu mövsüm sonuncu pillədə qərarlaşaraq Premyer Liqanı tərk edəcək. “
Ürfan Məmmədzadə
