Premyer liqanın 19-cu turunda "Qəbələ" ilə qarşılaşacaq "Qarabağ" artıq Qəbələdədir.
Korner.az-ın klubun rəsmi saytına istinadən yaydığı xəbərə görə, 2013-cü ildə ilk rəsmi oyununa çıxacaq "Qarabağ" artıq ölkənin şimalına yollanıb. 50 günlük fasilədən sonra ilk oyununa çıxmağa həzırlaşan Ağdam klubu bu gün oyunun keçiriləcəyi meydançada məşq edəcək.
"Qarabağ" Qəbələyə tam heyətlə yollanıb. Sadəcə, yeni transfer Reynaldo sabahkı görüşdə iştirak etməyəcək. Braziliyalı gələn həftə "Sumqayıt"la baş tutacaq oyunda hazır olacaq.
Qeyd edək ki, "Qarabağ" Qəbələyə seriyasını davam etdirməyə və seriyanı qırmağa gedir. İki ildir "Qəbələ"ni məğlub edə bilməyən Ağdam klubu sonuncu dəfə 2 il bundan əvvəl fevralın 13-də "Qəbələ" üzərində doğma meydanda 3:0 hesabıyla qaib gəlmişdi.
Cari mövsümün ilk yarısında baş tutan görüşdə "Qəbələ" mərkəzi arenada "Qarabağ"ı 2:1 hesabıyla məğlub edib. 11-ci tur çərçivəsində, oktyabrın 31-də qeydə alınan nəticədən sonra "Qarabağ" baş tutan 8 görüşdə (7 çempionat, 1 kubok) məğlubiyyət üzü görməyib (6 qələbə, 2 heç-heçə).
Göründüyü kimi, "Qarabağ" Qəbələyə 3 aydan çoxdur davam edən məğlubiyyətsiz seriyasını davam etdirməyə gedir. "Qarabağ" sabahkı oyunda qələbə qazanarsa, rəqib qarşısında iki ildir davam edən qələbəsizlik seriyasına son qoyacaq.
