“Qarabağ”ın vitse-prezidenti Tahir Gözel komandasının Azərbaycan kubokunun finalına yüksəlməsinə münasibət bildirib.
Korner.az-ın klubun saytına istinadən verdiyi xəbərə görə, T.Gözəl finaldakı rəqibin “Neftçi” olmasına ikiqat sevindiyini deyib:
“Bu, mənim “Qarabağ”la üçüncü finalım olacaq. 2006 və 2009-cu illərdə Azərbaycan kubokunu qazanıb sevinc yaşamışıq. Altı il sonra yenidən finalda oynamaq olduqca xoş duyğudur. Üstəlik rəqibimizin “Neftçi” olması da final qarşılaşmasına əlavə rəng qatacaq. Finalda “Neftçi”ylə qarşılaşmaq mənə ikiqat sevinc bəxş edir. “Neftçi” Azərbaycan futbolunda xüsusi yeri olan klubdur. Hər zaman “Neftçi”ylə oyunlar mənim üçün xüsusi olub. Bunu daim açıqlamalarımda bildirmişəm. Daha öncə də qeyd etdiyim kimi, “Qarabağ” – “Neftçi” oyunu aslanların döyüşü kimidir”.
Klub rəsmisi kubokun final matçının keçiriləcəyi məkanla bağlı da fikirlərini bildirib: “Final görüşünün Qəbələ və ya baş bir şəhərdə keçirilməsi ideyası müsbətdir. İstənilən halda belə bir derbinin, gözəl qarşılaşmanın bölgədə keçirilməsi ölkə futbolunun inkişafı və populyarlığı baxımından olduqca yaxşı amildir. Futbol ictimayyətini, azarkeşləri maraqlı qarşılaşma gözləyir. Şəxsən stadionda komandamı dəstəkləyəcəyim anı gözləyirəm. Hər kəsi bu oyuna dəvət edirəm. Xüsusilə azarkeşlərimizi oyuna dəvət edir, onların oyunun keçiriləcəyi stadionu doldurmasını istərdim”.
