“İlk olaraq cəbhədə şəhid olan oğullarımızın ailələrinə, yaxınlarına baş sağlığı verirəm. Onların qaşrısında baş əyirik. Oyuna gəldikdə “Kəpəz” məğlub oldu. Deyərdim ki, bu “Kəpəz”in ən zəif oyunu idi. “Qarabağ” ən ideal heyətlə bizə futbol dərsi keçdi. Acı da olsa, bunu etiraf etmək lazımdır. Heyətdə problemlər var. Çalışacağıq ki, futbolçuların daxilində olan qüvvənin hesabına toparlanaq. Bugünkü oyunu heç bir yerə bağlamaq olmaz”.
Korner.az-ın Sportnet.az-a istinadən yaydığı xəbərə görə, bunu “Kəpəz”in baş məşqçisi Şahin Diniyev Topaz Premyer Liqanın 29-cu turunda “Qarabağ”la oyundan (0:4) sonra keçirilən mətbuat konfransında deyib.
Təcrübəli mütəxəssis daha sonra bunları bildirib:
“Xarakter indiki vəziyyətdə bilinir. Çalışmalıyıq ki, bu situasiyadan çıxaq. “Qarabağ”ın təzyiqi nəticəsində müdafiədə səhv oldu. Kubok və çempionatın 28 turunda 4 müdafiəçi ilə oynayırıq. Futbolçularımı qorumalıyıq. Hələ mövsümün sonu deyil. Uşaq səhvi edirik, amma onlar da insandır. Komanda daxilində heç bir problem yoxdur. Psixoloji durum fiziki amillə bağlıdır. İnsan yorulduqda səhv etməyə məhkumdur. Buraxılan səhvlər də psixologiyada problem yaradır. Səbəb deyil, amma bu amillər var”.
Ş.Diniyev komandanın gələcək vəziyyətindən söz açıb:
“Bununla barışmaq olmaz. Xarakter burada görünür və əl-ələ verib hazırkı durumdan çıxmalıyıq. Bu qədər qazandığımızı sonlarda itirə bilmərik. Soyuq başla analiz etmək lazımdır. İndividual və komanda olaraq bu vəziyyətdən çıxmalıyıq”.
