"Sumqayıt"la yoxlama görüşündə (0:1) “Kəpəz”in heyətində meydanda olanlar arasında Xəyal Zeynalov inamlı çıxışı ilə seçilib. İkinci hissədə oyuna daxil olan qolkiper "Kəpəz"i bir neçə epizodda qoldan xilas etməklə, diqqət mərkəzinə düşüb.
Korner.az-ın klubun saytına istinadən yaydığı məlumata görə, X.Zeynalov matç və çıxışı haqda fikirlərini bölüşərkən deyib ki, yoxlama oyunlarının nəticəsi əsas olmasa da, məşqçilər komandanın, futbolçuların hansı durumda olmasını görə bilirlər.
“Tez bir zamanda oyunumuz da çatışmayan cəhətləri aradan qaldırmalıyıq. Hamımızın məqsədi "Kəpəz"i düşdüyü ağır vəziyyətdən çıxarmaqdır. İnşallah, bunun da öhdəsindən gələrik. Öz çıxışıma gəlincə, onu deyə bilərəm ki, hər dəfə meydana çıxanda komandama bütün bacarığımla kömək etməyə çalışıram. Düşünürəm ki, Sumqayıt klubu ilə görüşdə üzərimə düşən işin öhdəsindən müəyyən qədər də olsa, gələ bildim. Qapıçılar inamlı çıxış edəndə digər mövqe futbolçuları da ürəkli oynayırlar. Mən oyunda futbolçu yoldaşlarımın üstünə qışqırmaqla, onları mübarizəyə səsləyirəm" – deyə o bildirib.
