“Qələbə üçün alışıb-yanırdıq” – Sənan Qurbanov
24.11.2018 , 19:45
Topaz Premyer Liqasında XII turun “Keşlə” – “Qəbələ” (1:2) oyunundan sonra keçirilən mətbuat konfransında “qırmızı-qaralar”ın baş məşqçisi Sənan Qurbanov jurnalistlərin suallarını cavablandırdı.
O, əvvəlcə matç barədə fikirlərini bildirdi…
– Çox ciddi hazırlaşmışdıq. Fasilədə çalışdıq ki, çatışmazlıqlarımızı aradan qaldıraq. Tərlan Əhmədovun gəlişindən sonra “Keşlə” yüksəlişdə idi. Onları yaxşı təhlil etmişdik. Futbolçular verilən tapşırıqları yerinə yetirdilər. Bu, məni sevindirdi. Azarkeşlərimizi və komandanı təbrik edirəm. Qələbə üçün alışıb-yanırdıq. Çalışdıq ki, bu, bizə ziyan verməsin və futbolçuları düzgün kökləyə bilək.
– Hər an qol buraxa və üstünüyü əldən verə bilərdiz. Ancaq əks-hücum imkanlarından yararlana bilmirdiz…
– Daha böyük hesabla qələbə qazana bilərdik. Bunu tələskənliklə əlaqələndirərəm. 1 top fərqi ilə öndə idik və bu, gəginlik yaradırdı.
– Final fitindən sonra əsəbi görünürdüz…
– Oyun gərgin olduğuna görə əsəbləşmişdim. Son saniyələrdə künc zərbəsindən qol buraxa bilərdik. Səbəb bu idi.
– Ceyms Adeniyi cəzalı duruma düşdü və növbəti matçda oynamayacaq. Bu, sizə necə təsir edəcək?
– Son dönəmlərdə formadadı. Önəmli futbolçudu, Amma onu əvəzləyə biləcək oyunçularımız var. Məşqlər əsasında onu kimin əvəzləyəcəyinə qərar verəcəyik.
