Yuri Syominin istefasından sonra “Qəbələ” axtardığı baş məşqçini rəsmən tapıb.
Korner.az-ın məlumatına görə, müəyyən müzakirələrdən və seçimlərdən sonra “Qəbələ” baş məşqçi postunu bolqarıstanlı mütəxəssis İvaylo Petevə həvalə etməyə qərar verib.
Bu barədə Futbol11.az saytına klubun baş meneceri Zaur Əzizov məlumat verib. Əzizov bildirib ki, məşqçi ilə danışıqlar müsbət yekunlaşıb və onunla yaxın günlərdə iki illik müqavilə imzalanacaq. Petevdən istədiyi cavabı alan “Qəbələ” digər məşqçilərlə danışığı dondurub.
Qeyd edək ki, Bolqar mütəxəssis gənc olmasına baxmayaraq, çalışdığı klublarda uğur qazanmağı bacarıb. O, başçılıq etdiyi “Ludoqorets”i 2010/11 mövsümündə aşağı dəstədə çempion etməklə əsas liqaya yüksəldib. Daha sonra 2 dəfə Bolqarıstan çempionu olub (2011/12; 2012/13), 2012-ci ildə çempion olduğu “Ludoqorets”lə ölkə kubokunu başı üzərinə qaldırıb.
Mütəxəssisin son klubu Kipr AEL-i olub. Bir mövsüm çalışdığı Limassol təmsilçisinə isə gənc çalışdırıcı gümüş medal qazandırıb.
