Avropa Liqasının III təsnifat mərhələsində Kiprin "Apollon" klubunu məğlub edən "Qəbələ" pley-offa vəsiqə qazandı.
Korner.az-ın məlumatına görə, bu mərhələdə "qırmızı-qaralar" Yunanıstanın "Panatinaykos" klubu ilə qarşılaşacaq
Əsası 1908-ci ildə qoyulan peşəkar futbol klubu Yunanıstanın ən köklü və titullu komandalarından biridi. “Panatinaykos” son 5 ildə heç bir titul qazana bilməyib. Buna baxmayaraq, komanda 20 dəfə Yunanıstan çempionu olub – sonucu çempionluq 2010-cu ildə qazanılıb. Ölkə kubokunu 17 dəfə başı üzərinə qaldıran “yaşıllar” bu uğura da sonuncu dəfə 5 il öncə nail olub.
Ötən il ölkə çempionatını lider “Olimpiakos”dan 12 xal geridə tamamlayaraq ikinci pillədə başa vuran "Panatinaykos" ən yaxın izləyicisi PAOK-u cəmi bir xal qabaqlaya bilib. Keçirdiyi 34 matçda 59 qol vuran “yaşıllar” öz qapılarında 31 qol görüb. Yunanıstan liqasında 7 dəfə rəqiblərinə baş əyən “Panatinaykos” 6 dəfə sülh bağlayıb və 21 qələbəyə sevinib. Doğma meydanda ideal oynayan 17 oyunun 15-də qələbə qazanıb.
Hücumçular…
Komandanın ən məhsuldar hücumçusu 9 nömrəli futbolçusu Markus Berqdi – 24 oyuna 16 qol (Liqada keçirilən oyunlara əsasən). Digər hücumçulardan Nikolas Karelis 36 oyuna 16 qol, Mladen Petric 29 oyuna 7 qol vurub. Ən məhsuldar yarımmüdafiəçi isə Daniel Pranyiçdi. O, 29 oyunda 4 qol vurub.
Avrokuboklardaki tarixi…
Komandanın avrokuboklarda da zəngin tarixi var. Ən böyük hesablı qələbə 1992-ci ildə “Ekstensiv” klubu üzərində qazanılıb. Klubun biabırçı məğlubiyyəti isə 1989-cu ildə "Dinamo" Buxarestlə matçda yaşanıb – 1:6.
Çempionlar Liqasında cəmi 27, Kuboklar kubokunda 7, Avroliqada 29 matç keçirib. Klub tarixinin avrokuboklarda bombardiri 25 qol vurmuş polşalı hücumçu Xiştof Vaşixa olub. Bu futbolçu həm də klub tarixinin bütün turnirlərdə keçirilən matçlarda vurduğu qol sayısına görə də rekordçudu – 288.
“Panatinaykos” ötən il Avroliqada çıxış edib. 8 oyun keçirən komanda 2 dəfə qələbə qazanıb, 2 dəfə heç-heçə və 4 dəfə məğlub olub. Avroliqada oynanılan oyunlara əsasən komandanın bombardiri Nikolas Karelisdi – 5 oyun 2 qol.
