Sloveniyada hazırlıqlarını davam etdirən “Qəbələ” adıçəkilən ölkədə ikinci yoxlama oyununu keçirib. Korner.az– ın klubun rəsmi saytına istinadən məlumatına görə, Fatih Kavlakın yetirmələri Serbiya təmsilçisi “İndiya” ilə üz-üzə gəlib.
Komanda meydançaya Diego Koşta Silva, Vurğun Hüseynov (k), Nodar Məmmədov, Ürfan Abbasov, Muammer Erdoğdu, Bruno da Silva, Elmar Baxşıyev, Kamal Mirzəyev, Rövşən Əmiraslanov, Viktor Mendi, Amil Yunanovdan ibarət start heyəti ilə çıxıb.
Görüşün ilk hissəsi tərəflərin qarşılıqlı hücumları ilə start götürüb. Tədricən üstünlüyü ələ keçirən serblər 12-ci dəqiqədə hesabı açıblar. Bu qoldan sonra hücumlarının kəsərini artıran “Qəbələ” ardıcıl bir neçə fərqlənmək imkanı yaxalayıb. Lakin Mendinin qüvvətli zərbəsindən sonra qapı çatı, Yunanovun zərbəsindən sonra qapıçı qola imkan verməyib. Əvəzində 26-cı dəqiqədə serblər fərqi 2 topa çatdırıblar.
İkinci hissəyə “Qəbələ” fərqli heyətlə çıxıb. Start heyətdən yalnız Ürfan Abbasov mübarizəni davam etdirib: Elnar Kərimov, Deyan Kelhar, Murad Musayev, Şəhriyar Xəlilov, Ürfan Abbasov, Daniel Kruz, Yaşar Abuzərov, Rəşad Abdullayev, Rəşid Əmiraslanov, Aleksandr Çertoqanov (k), Yannik Kamanan.
İlk hissədən fərqli olaraq “Qəbələ” ikinci 45 dəqiqəyə daha sürətli başlayıb. Hissənin əvvəlində Kamanan uzun keçiddən topu qapıya göndərsə də, qapı dirəyi qola mane olub. Ardınca Kamanan daha bir şansdan yararlana bilməyib. Matçın qalan dəqiqələrində hər iki tərəf bir neçə əlverişli imkan qazansa da, hesab dəyişməyib – 0:2. Beləliklə, “Qəbələ” Sloveniyada keçirdiyi ikinci matçdan da məğlubiyyətlə ayrılıb.
Qeyd edək ki, yüngül zədəsi olan Luis Hilario Dodo heyətdə yer almayıb.
