Moldovanın Tiraspol şəhərində 15 yaşa qədər futbolçular arasında keçirilən beynəlxalq turnirə bu gün baş tutan matçlarla yekun vurulub.
Korner.az-ın məlumatına görə, daha öncə keçirdiyi 4 matçda qalib gələrək finala vəsiqə qazanan “Qəbələ” həlledici oyunda Uşaq Gənclər İdman Məktəbi (Ukrayna) ilə qarşılaşıb. Qrup mərhələsində üz-üzə gələn komandaların ilk duelindən “Qəbələ” qalib ayrılmışdı – 2:1.
Bu dəfə isə ukraynalılar “qırmızı-qaralar”ı məğlub etməyi bacarıb. Belə ki, oyunun əsas vaxtında hesab açılmayıb. Qalibi müəyyənləşdirmək üçün birbaşa penalti vuruşlarına keçilib. Penalti vuruşlarını daha dəqiq yerinə yetirən Uşaq Gənclər İdman Məktəbi 4:2 hesabilə qalib gəlib və qızıl medallara sahib olub.
Final matçının ardından turnirin mükafatçılarının və müxtəlif nominasiyalar üzrə qaliblərinin təltifetmə mərasimi baş tutub. İkincilik kuboku və gümüş medallara sahib çıxan futbolçularımız daha iki nominasiyanın da qalibi olublar. Komandamızın üzvü Coşqun Sülüymanov “ən yaxşı hücumçu”, Süleyman Süleymanov isə “ən yaxşı qapıçı” mükafatlarına sahib çıxıb.
