Azərbaycan kubokunun 1/8 final mərhələsində I Divizion təmsilçisi “Qaradağ Lökbatan”ı 2:0 hesabı ilə məğlub edən “Qəbələ” ¼ finalda “Qarabağ”ın rəqibi oldu.
Korner.az hər iki baş məşqçinin oyunsonrası fikirlərini təqdim edir:
Adil Mahmudov, “Qaradağ Lökbatan” klubunun baş məşqçisi: “Ciddi rəqiblə qarşılaşdıq, “Qəbələ” ölkə çempionatında iddialı komandadır. Çətin oyun olacağını bilirdik. Komandam yaxşı oynadı, lakin müdafiəmizdə müəyyən boşluqlar oldu ki, rəqib də bundan yararlandı”.
Ramiz Məmmədov, “Qəbələ” klubunun baş məşqçisi: “Rəqibimiz güclü komandadır, iddialıdır. Bu gün yaxşı oyun göstərdilər. Heyətdə müəyyən dəyişikliklər etmişdik, gənc futbolçulara şans verdik. Onların oyunundan razı qaldım”.