“Avro Liqada öz meydanımızda qeydə alınan heç-heçə yaxşı nəticə deyil. İndi cavab görüşündə “Qəbələ”yə öz oyunumuzu diktə etməyə çalışacağıq”.
Korner.az-ın məlumatına görə, bu sözləri “Lill”in yarımmüdafiəçisi İbrahim Amadu Avropa Liqasının III təsnifat mərhələsinin ilk oyununda evdə “Qəbələ” ilə 1:1 bərabərə qaldıqları oyundan sonra klubun rəsmi saytına deyib.
Amadu sözlərinə belə davam edib:
“İlk hissədə oyunumuzda lazımi temp yox idi. Ona görə də rəqib tez-tez kəskin hücumlar təşkil edirdi. Lakin fasilədən sonra hər şey dəyişdi. Biz daha güclü oynadıq. Təəssüf ki, qol imkanlarından yararlana bilmədik. Cavab görüşü çətin olacaq, amma biz qələbəyə oynayacağıq”.
Bu komandalar arasında cavab görüşü avqustun 4-də Bakıda keçiriləcək. Matç saat 21:00-da başlayacaq.
