.jpeg)
Ölkədə uşaq futbolunun inkişafına xüsusi diqqət ayıran “Qəbələ” aşağı yaş qrupları üzrə çempionatlarda göstərdiyi oyun və əldə olunan nəticələrlə işini nə dərəcədə doğru qurduğunu açıq şəkildə nümayiş etdirir.
Korner.az-ın klubun rəsmi saytının verdiyi xəbərə görə, hazırda U-11, U-13, U-14, U-15, U-16 və U-17 Liqalarında mübarizə aparan “qırmızı-qaralar” bütün çempionatlara liderlik edir. İstedadlı və peşəkar futbolçu yetişdirməyi qarşısına məqsəd qoyan “Qəbələ” Futbol Akademiyası prinsiplərinə uyğun olaraq futbolçulara hər oyunda qələbə qazanmaq tapşırığı verməsə də, nümayiş etdirilən gözəl oyununun məntiqi nəticəsi kimi qalibiyyətlər sıralanır.
U-11 Liqasının Şimal-Qərb və Qarabağ regionu üzrə çempionatında mübarizə aparan “Qəbələ”nin 11 yaşa qədər futbolçulardan ibarət komandası keçirdiyi 8 oyunu maksimum nəticə ilə tamamlayıb. Rəqib qapılarına 33 dəfə yol tapan Zaur Hacıyevin yetirmələri qapılarında yalnız bir top görüblər.
U-13 Liqasının Şimal-Qərb və Qarabağ regionu üzrə çempionatında da “Qəbələ” məğlubiyyətsiz turnir cədvəlinə liderlik edir. Keçirdiyi 9 oyunda 8 qələbə qazanan və 1 matçdan sülhlə ayrılan Sərdar Qafarovun komandası rəqib qapılarından 47 top keçirib. 2 dəfə isə topun çərçivədən keçməsinə mane ola bilməyib.
14 yaşa qədər futbolçulardan ibarət komanda mübarizə apardığı U-14 Liqasının Şimal-Qərb və Qarabağ regionu üzrə çempionatında aşkar hegemonluğunu davam etdirir. 9 oyunu maksimum nəticə ilə tamamlayan Şəhruz Mustafayevin yetirmələri qapılarını toxunulmaz saxlamağı bacarıblar. Əvəzində isə rəqiblərini nə az, nə çox 74 dəfə meydançanın mərkəzinə dəvət ediblər.
Kapital Bank U-15 Liqasının A qrupunda çıxış edən “Qəbələ”nin 15 yaşa qədər futbolçulardan ibarət komandası “doqquzluğ”un şəriksiz lideridi. Keçirdiyi 13 oyunda 39 xal toplayan Hüseynqulu Quliyevin yetirmələri rəqiblərini 65 dəfə məyus etməyi bacarıblar. “Qırmızı-qaralar” qapılarında cəmi 6 qol görüblər.
Arxada qoyduqları 12 turda 10 qələbə qazanan “Qəbələ”nin 16 yaşa qədər futbolçulardan ibarət komandası U-16 Liqasına başçılıq edir. 1 heç-heçə və 1 məğlubiyyət alan “qırmızı-qaralar” 77 dəfə fərqlənməyi bacarıblar. Əvəzində isə qapılarında 9 top görüblər. Çempionatın ən sərrast futbolçuları siyahisına “Qəbələ”ni təmsil edən Viqar Əlibabayev başçılıq edir – 30 qol.
