Qısa müddət öncə “Qəbələ” İdman Klubunun nəzdində fəaliyyətə başlayan cüdo məktəbi artıq bəhrə verməyə başlayıb.
Korner.az-ın klubu rəsmi saytna istinadən yaydığı xəbərə görə, mərhum prezident Heydər Əliyevin xatirəsinə həsr olunmuş cüdo üzrə 9 saylı Uşaq Gənclər İdman Məktəbinin Açıq Birinciliyində Fərid Quliyev bütün rəqiblərinə qalib gələrək qızıl medala sahib olub. Cəmi 38 gündür cüdo ilə məşqul olan Fərid 1998-ci ildə Qəbələ rayonunun Laza kəndində anadan olub. 1 may 2013-cü ildən klubun Qəbələ şəhərində təşkil etdiyi cüdo məktəbində məşqlərə başlayıb və qısa müddət sonra ilk uğurunu qazanıb.
Xatırladaq ki, Qəbələdə fəliyyət göstərən cüdo məktəbinə klubun Qəbələ şəhəri üzrə məşqçisi, idman ustası Rail İsmayılov rəhbərlik edir. Hazırda onun rəhbərliyi altında 70-dən artıq idmançı cüdonun sirlərinə yiyələnir.
