"İlk dəqiqələrdən ispanların bizə nisbətən daha hazırlıqlı olduğu hiss olunurdu. Biz ötən həftə keçirdiyimiz oyunlarda daha çox qüvvə və enerji sərf etmişdik. Ona görə də bu oyuna yorğun çıxmışdıq. Lakin demək olmaz ki, biz nəyisə düzgün etmədik". Korner.az-ın məlumatına görə, bu sözləri İtaliya millisinin baş məşqçisi Çezare Prandelli İspaniya ilə oyundan sonra deyib.
Avro-2012-nin onlar üçün yaxşı keçdiyini bildirən çalışdırıcı komandanın problemlərindən danışdı:
"Hər şey qaydasında idi. Sadəcə olaraq fiziki cəhətdən komandada problemlər hökm sürürdü. İkinci qoldan sonra artıq məğlubiyyət qaçılmaz görünürdü ki, belə də oldu. Bununla belə, düşünürəm ki, çox yaxşı turnir keçirdik. Qələbə münasibətilə də İspaniya millisini təbrik edirəm".
