“Plagiat video” mövzusuna “Neftçi”nin cavabı: “Belə çıxır ki, “Fənərbağça” ideyanı bizdən oğurlamışdı?”
21.01.2019 , 19:49
Bu gün “Neftçi”nin rəsmi feysbuk səhifəsində paylaşılan videorolik əks cəbhədəki azarkeşlər və mətbuat tərəfindən birmənalı qarşılanmayıb. Məsələ ondadır ki, “ağ-qaralar” plagiatlıqda ittiham edilir: “bunu “Fənərbağça” etmişdi”. Özü də bu, birinci dəfə deyil. Oxşar söz-söhbətlər bir müddət əvvəl “flaqman”ın feysbuk səhifəsində bir vaxtlar “Liverpul”un çəkmiş olduğu videorolikin oxşarını hazırlayıb yayımlayarkən də çıxmışdı.
“Neftçi”nin mətbuat xidmətinin rəhbəri Rüstəm Allahverdiyev isə hesab edir ki, ortaya qoyduqları iş – istər “Liverpul”un, istərsə də “Fənərbağça”nın çəkdiyi videoların oxşarını çəkmələri oğurluq deyil, əksinə, bu gün bütün dünyada qəbul olunmuş bir şeydir: “Bugünkü videodan sonra bizi plagiatlıqda ittiham edən mətbuat orqanları araşdırılacaq bu qədər mövzu var ikən “Neftçi”nin videosunu araşdırırlar. Özü də araşdırmaları çox səthidir. Dünyanın bir çox ölkəsində “Gopro”-su olan əksər klublar buna oxşar videolar hazırlayırlar. Məsələn, biz yay hazırlıq dövründə “Gopro” ilə qapıçıların məşqindən video hazırlamışdıq. Onda belə çıxır ki, “Fənərbağça” da bizdən götürmüşdü ideyanı? Nədənsə heç kim edəndə plagiat olmur, “Neftçi” edəndə plagiat olur. Bizim video ilə bağlı araşdırma aparanlardan xahiş edərdim, araşdırmalarını daha çox başqa yöndə qursunlar. Bu gün televiziya verilişlərinin əksəriyyəti hansısa verilişin əsasında çəkilir. Belə çıxır ki, hamısı plagiatdır? Belə çıxır ki, heç kəs plagiatlıq etmir, yalnız “Neftçi” edir? Bu təcrübə hər yerdə var və “copywriter”-lik adlandırılır. Paylaşdığımız video plagiat deyil. Məsələn, bu gün bir çox klub futbolçuların tirəvurma, yaxud “challenge”-i keçirir. Belə çıxır ki, biz də sabah hər hansı tirəvurma, ya da penalti “challenge”-inin videosunu hazırlasaq, plagiat olacaq? Yəni bir klub belə şeyləri edirsə, başqaları edə bilməz? Yaxud dünyada hər hansı filmin ssenarisi əsasında 2-3 film çəkilirsə, plagiatlıq edirlər? “Liverpul”un videosunun oxşarını çəkməyimizə gəlincə, bunu “Liverpul”dan da əvvəl edənlər olub. Məsələn, Moskva “Spartak”ı eyni videonu hazırlamışdı. Yəni ideya “Liverpul”un deyildi”.
Klub rəsmisi sonda onları buna görə tənqid edən mətbuata sual da verdi: “Açığı, “Neftçi” biz bu cür şeylərə çox fikir vermir. Elə yazılara fikir versək, gərək heç bir iş görməyək. Alqışlamaq, daha yaxşısını tələb etmək əvəzinə, plagiatda ittiham etmək düzgün deyil. Özləri ortaya nəsə qoysunlar. Belə çıxır ki, Avropa mətbuatında çıxan hər hansı məlumatı bizim mətbuat orqanları istinadsız verirlərsə, plagiatlıq etmirlər? Etik qaydalara uyğun hərəkət edirlər?”
