Azərbaycan Premyer Liqasının XXIX turunun qarşıdan gələn “İnter” – “Bakı” görüşü hər iki komanda üçün sayca 31-ci olacaq. Bunadək komandalar bir-birilə 30 dəfə qarşılaşıb, 25 oyun çempionat çərçivəsində keçirilib və 5 matç isə ölkə kubokunun payına düşür.
Korner.az-ın məlumatına görə, “bankirlər” rəqibini 10 dəfə məğlub edə bilib, “Bakı” isə 11 qələbəyə malikdi. Bu qələbələrin biri oyuna əlavə olunmuş vaxtda qeydə alınıb, digər qələbə isə texniki olub. 30 oyunun 9-da heç-heçə qeydə alınıb. Vurulan topların fərqi “Bakı”nın xeyrinədi – 26:19.
Komandalar ilk dəfə 2004/05 mövsümündə çempionat çərçivəsində üz-üzə gəlib. Həmin görüş 0:0 hesabıyla başa çatıb. “İnter” və “Bakı” qarşıdurmasında ilk qolun müəllifi “Bakı” klubunun gürcüstanlı yarımmüdafiəçi Aleksandr Qoqoberişvili olub.
Bu mövsümdə komandalar artıq bir-biri ilə 5 dəfə qarşılaşıb və 2 matç “İnter”in qələbəsilə başa çatıb – 1:0 və 2:1, digər 3 oyun isə heç-heçə ilə yekunlaşıb – 0:0, 1:1, 2:2. “İnter” – “Bakı” oyunlarında ən populyar hesab 1:0-dır. Belə nəticə 30 görüşün 14-də qeydə alınıb.
Azərbaycan çempionatında “Bakı”ya qarşı keçirilən ev oyunlarında “İnter” üstünlüyə malikdi. 12 qarşılaşmada ev sahibləri 5 dəfə qələbəyə seviniblər. 4 matçda “Bakı” qələbə qazanıb. Digər 3 oyun isə bərabərliklə başa çatıb. Bu qarşılaşmalarda top fərqi “Bakı”nın xeyrinədi – 8:7, amma qeyd edək ki, qonaq komandanın 3 qolu texniki qələbənin nəticəsidi.
“İnter” – “Bakı” matçı mayın 4-də keçiriləcək. Oyun saat 21.00-da başlayacaq.
