“Fanatlarımıza təşəkkür edirəm. Bizə sona qədər dəstək oldular, əla atmosfer yaratmışdılar. Artıq komandaya fanatların dəstəyi var, klublarını sevməyə başlayıblar”. Bunu “Neftçi”nin baş məşqçisi Tərlan Əhmədov deyib.
Azərbaycan Premyer Liqasının X turunda “Sumqayıt”ı qəbul edən paytaxt təmsilçisi son dəqiqələrdə vurduğu qol sayəsində 2:1 hesablı qələbə qazanıb.
Matçdan sonra təşkil edilən mətbuat konfransında Əhmədovun qalibiyyət şərhi belə olub: “Oyunçularıma təşəkkür edirəm. Gəncə səfərindən sonra vurğulamışdım ki, bu, ən ağır oyunlarımızdan biri olacaq. Rəqib meydanda çox işgüzarlıq göstərir. Bəzi zəif cəhətləri var. “Sumqayıt” sona yaxın müdafiəyə çəkilir, biz də hücumu gücləndirdik. Hər iki komanda gözəl futbol göstərdi. Əzmkarlıq sayəsində qələbə qazandıq. Bu futbolçularla işlədiyim üçün özümlə qürur duyuram”.
– Mövsümün əvvəlindən baş məşqçi olsaydınız, komanda hazırda neçənci yerdə gedərdi?
– Hər şey zərurətdən irəli gəlir. Bəlkə əksinə olacaqdı. Sadəcə, göstərilən etimadı doğrultmağa çalışırıq. 4 qələbə hələ heç nə deyil. Yolun əvvəlindəyik. 4 tur əvvəl hamı “Neftçi”ni 3 xallıq komanda sayırdı. Amma indi bizə diqqət başqa cürdü. Bu üzdən işimiz getdikcə çətinləşir. Eyforiyaya qapılmamalıyıq.
– Sizə elə gəlmir ki, oyunçularda özünəinam arxayınlığa çevrilib?
– Komandada istək həddən artıq çox idi. Qolu hissənin sonlarına yaxın buraxdıq. Bu, mənim üçün siqnal idi. Arxayınlıq yox, həyəcan var idi. Bunu da aradan götürə bildik.
– Turnir cədvəlinə baxanda görürük ki, əsl sınağınız bundan sonra olacaq…
– Bura gələndə 2 oyun uduzduq, dedilər ki, komanda gedir. Qalib gələndə başqa söz dedilər. Gələndə çalışdım ki, komandanı düşdüyü durumdan çıxarım. 4 qələbə sözü verməmişdim. Mən özünəinam yaratmağa çalışdım.
– Böyükağa Hacıyev müsahibəsində deyib ki, Tərlan mənim məktəbimi keçib…
– Ona minnətdaram. Allah şəfasını versin.
– Zaur Svanadze “Keşlə” komandasından göndərildi və çempionatda sadəcə 1 əcnəbi məşqçi qaldı. Bu, yaxşı, yoxsa pis haldı?
– Heç bir məşqçiyə istefa arzulamazdım. Deyəcəyim bir şey yoxdu. Yerlilərlə yanaşı, əcnəbi də olsun ki, futbolumuz inkişaf etsin.
– Növbəti turda “Zirə” ilə qarşılaşacaqsınız. İlk görüşdəki məğlubiyyət sizi daha həvəsli etməyəcək?
– Mən məğlub oldum prinsipi ilə yaşamıram. “Zirə” ilə 3 dəfə görüşəcəyik. Öz işimizi davam etdirib, 3 xal üçün meydana çıxacağıq.
apasport.az
