Ozobiç: “Qol vurmaq istəyirdim”

 Oyunda son qolun müəllifi olan xorvatiyalı yarımmüdafiəçi öncə oyun barədə danışıb:

– Hesab edirəm ki, iki oyuna görə, biz daha məzmunlu futbol sərgilədik və daha çox layiq olan qalib gəldi. Çox sevinirəm ki, Avropa Liqasının qrupunda oynayacağıq.

– Öz oyunun barədə nə düşünürsən. Fərqlənəcəyini düşünürdün?

– Əlbəttə, qol vurmaq istəyirdim. Sevinirəm ki, fərqlənməyi bacardım. İnanıram ki, qarşıdakı matçlarda da qol vurmağı bacaracam.

– Bu gün oyuna sanki xüsusi motivasiya ilə çıxmışdınız. Bu, bizə elə gəlirdi, yoxsa..?

– Oyunun əhəmiyyəti çox böyük idi. Tərəzidə Avropa Liqasının qrupu dayanmışdı. Zənnimcə, bu axşam yaxşı oynadıq.

– Rəqib düşərgədə həmyerlilərin – baş məşqçi və bir futbolçu xorvatiyalı idi. Oyundan sonra onların əlini sıxarkən tərəddüd etmirdin?

– Xeyr. Axı, bu, futboldur və hər kəs öz komandasının uğuru üçün çalışır. Bu gün “Qarabağ” qələbəyə daha layiq idi. Yeri gəlmişkən, məni qələbə münasibəti ilə təbrik etdilər və qrup mərhələsində uğurlar arzuladılar.

– Sabah qrup mərhələsinin püşkatmasıdı. Yenidən BATE-ylə qarşılaşmaq istərdinmi?

– Deyə bilmərəm, kimlərlə qarşılaşacağıq. Ancaq onlarla düşsək, kimin daha yaxşı olduğunu göstərməyə çalışacağıq.

– İki dəfə “Qəbələ”nin heyətində Avropa Liqasının qrupunda oynamısan. İndi isə “Qarabağ”la eyni həyəcanı yaşayacaqsan. Hansı komanda ilə oynamaq sənə daha maraqlı gəlir?

– Mən “Qarabağ”ın futbolçusuyam və ən yaxşı oyunumu nümayiş etdirmək istəyirəm. Ümid edirəm ki, çoxlu xal toplayacağıq.