Hər qrupun, komandanın mütləq bir lideri olmalıdı. Bu ənənə hələ məktəb vaxtından başlayır. Uzağa getmədən məktəb illərini yada salaq. Normalda sinifdə intizamına görə xüsusi seçilən şagird sinif nümayədəsi olur. Mən isə intizamlı liderlərdən danışmayacam. Yəqin razılaşarsınız ki, hər bir sinifin öz “şef”i, hər bir mərtəbənin öz “polojennik”i, hər bir məktəbin də öz “avtoritet”i olur. Digər şagirdlər bu liderlərdən bir qədər çəkinir, hansısa hadisəyə görə “gözü qorxur” və tabe olmağa məcbur olur.
Futbol komandası da bir qrup olduğundan bu qrupunda lideri olur. Bəli, futbolda da elə liderlər var ki, digər komanda yoldaşları ondan qorxur, ya da çəkinir. Bu yazıda elə futbolçuları yada salacam.
1. Pepe (Real Madrid)
Mövzuya ən uyğun gələn futbolçulardan biri də Pepedi. Yəqin ki, portuqaliyalının bu reytinqin başında gələcəyini təxmin etmişdiz.
Pepe artıq “Heyvan”, “it” və s. kimi ləqəbləri öz əziyyəti ilə “qazanıb”. Rəqib futbolçulara qarşı etdiyi olduqca kobud hərəkətlər ona nifrət edənlərin sayını artırmaqdan başqa bir işə yaramayıb. Amma Pepe tək rəqiblərə qarşı sərt deyil. Məsələn, komanda yoldaşı Arbeloanın dizinə necə təpik vurmasını yada salaq.
İspaniya La Liqasının oyunlarının birində “Valensiya” “Real” Madridlə qarşılaşırdı. Həmin matçda rəqib futbolçu Pepeyə qarşı kobudluq edir və nəticədə portuqaliyalı müdafiəçi zədələnir. Ciddi xəsarət almasa da, qazonda “can verən” futbolçunu komanda yoldaşı Alvaro Arbeloa qaldırmaq istəyir. Lakin bu Pepenin xoşuna gəlmir və Arbeloanın ayağında zərbə vurur. Arbeloa isə heç nə olmamış kimi komanda yoldaşına yardım etməyə davam edir. (VİDEO)
2. Aryen Robben (Bavariya)
Komanda yoldaşlarının dediyinə görə, Robben məşqlərdə tez-tez davalara səbəb olur. Bəzən hisslərini cilovlamaqda çətinlik çəkən futbolçu, görünür, komanda yoldaşlarının gözünün odunu ala bilib. Onun Müller və Filip Lamla mübahisələri bir vaxtlar mətbuatın əsas mövzusuna çevrilmişdi. Alman müdafiəçi ilə yaşanan anlaşılmazlığı xatırlamaq yerinə düşər.
Məşqlərin birində Filip Lam arxadan müdaxilə etməklə topu Robbendən oğurlayır. Bunu tam qaydalar çərçivəsində edən Filip Lam “alqış gözləyərkən qarğış aldı”. Hollandiyalı hücumçu komanda yoldaşını təbrik etmək əvəzinə onun sinəsinə zərbə endirərək Lamı qazona sıxdı. Filip isə dinməz-söyləməz məşqini davam etdirdi.
Bu hadisədən sonra Robben mətbuata açıqlama verib və:
“Hər şey qaydasındadı. Məşqlərdə belə şeylər olur. Biz bu məsələni yoluna qoyduq. Filipin özündən də soruşa bilərsiz”, – ifadələrini səsləndirib.
3. Andrey Arşavin
Güman ki, hər kəsə bu futbolçunun bu siyahıya hansı səbəblərdən düşməsi maraqlı gəldi. Karyerasının parladığı “Arsenal”da “fair play” qaydalarına riayət edən adi futbolçulardan biri olan Arşavin vətəni Rusiyaya qayıdanda artıq əvvəlki Andrey deyildi.
“Zenit”də olarkən məqş zamanı komanda yoldaşına elə zərbə endirmişdi ki, futbolçu həmin mövsüm 6 aya qədər komandasına kömək edə bilmədi.
ÇSKA Moskva komandası ilə matçların birində isə ona pas vermədən fərqlənən Bıstrovun üstünə çıxıb ayaqlaması bu şəkildə də daha aydın görünür.
Ardı olacaq…
İlkin Məmmədov
