Bu gecə keçirilən Ukrayna – İngiltərə qarşılaşmasında 0:2 hesabı ilə məğlub olan birincilər Avropa çempionatıpnda iştiraklarını başa vurublar. Oyundan sonra keçirilən mətbuat konfransında xeyli qəzəbli görünən ukraynalıların çalışdırıcısı Oleq Bloxin hakimləri "topa tutub": "Hakimlərdən narazı qaldım. Bu, nə hakimlik idi? Top qapı xəttini yarım metr keçir, hakim susur. Bəs onda 5-ci hakim nəyə lazımdır? Terri cərimə meydanında əllə oynayır, Kerroll futbolçumuzu dirsəyi ilə vurur, meydanın mərkəzində arxadan sürüşmə fəndi edir, hakim yenə susur. Belə hakimlikdən nə danışasan? Uduzduq, amma komandama görə utanmıram. Futbolçularım yaxşı oynadılar və məğlubiyyətə layiq deyildilər. Siz də onları tənqid etməyə cəhd etməyin. Oyunumuz xoşunuza gəlmədisə, mənə hücum edin".
