Bu gün 13 yaşlılar arasında keçirilən Azərbaycan çempionatında final matçı baş tutub. “
Korner.az-a qafqazinfo.az-a istinadən xəbər verir ki, həlledici oyunda “Neftçi” və “Xəzər Lənkəran” klubları üz-üzə gəlib.
Bu matçda 1:3 hesabı ilə uduzan “Xəzər Lənkəran” ikinciliklə kifayətlənib. Oyundan sonra klubun aşağı yaş qrupları üzrə koordinatoru İlhan Akgül fikirlərini bildirib. O, saytımıza açıqlamasında rəqibin heyətində lipalar olduğunu bildirib: “Məncə, bunu hər kəs gördü. Sanki ata və oğullar oynayırdı. Rəqibin heyətindəki futbolçulara baxın. Mənim də 13 yaşlı oğlum var. Onlara baxıram bir də bunlara. Bizim əksər oyunlarımız belədir. Gəlin aşağı liqalarda keçirdiyimiz matçlara baxın.
Bir bizim futbolçuları, bir də rəqibləri izləyin. Mən həmişə belə şeyə qarşı olmuşam. Niyə bu uşaqları biz bədbəxt etməliyik? Heç zaman öz fikrimdən çəkilməyəcəm. Özüm şəxsən futbolçuların yaşlarına nəzarət edirəm. “Xəzər Lənkəran” bütün cənubu təmsil edir. Yalnız bu regiondan olan uşaqlar akademiyamızda var. 138 futbolçumuz var və onlardan yalnız biri cənub zonasından deyil”.
Akgül klub rəhbərliyinin onlara hər zaman dəstək verdiyini bildirib: “Lipalarla məşğul olan insanlar Azərbaycan futboluna “bomba qoyublar”. Elə bil ki, o bomba partladığı zaman futbol məhv olacaq. Axı niyə bu uşaqların taleyi ilə oynayırlar? Uşaq futbolunda heç zaman nəticə düşünmək lazım deyil. Bizim rəhbərlik “sağ olsun”. Onlar heç zaman bizdən nəticə tələb etmədilər. Hər zaman “nə ehtiyacınız var” deyə soruşdular. Elə ona görə də “Xəzər Lənkəran”da işlər düzgün gedir və biz futbolçu yetişdirməklə məşğuluq. Bu mövsüm İbrahim Qədirzadə kimi 1999-cu il təvəllüdlü futbolçu əsas komandanın heyətinə düşdü. Bunlar rəhbərliyin dəstəyi sayəsindədir”.
Türkiyəli mütəxəssis bu il akademiyada nəticələrin yaxşı olduğunu deyib: “Onsuz da mən komandalarımı çempion sayıram. U11, U-12, U-13, U-14 hamısı bu ilə ilk “dördlüy”ə qədər irəlilədi. Bu da yaxşı nəticə sayılmalıdır. Mən komandalarımı çempion sayıram və onlardan razıyam. Amma yenə deyirəm ki, nəticə önəmli deyil. Biz əsas komanda üçün futbolçular yetişdirməliyik. Bu yöndə də işlərimizi davam etdirəcəyik”.
