“Komanda olaraq olimpiadanın necə sürətlə keçdiyini hiss etmədik. Gözlədiyimdən çox yaxşı çıxış etdim. Təbii ki, lovhəmdə medal arzusu var idi. Ancaq ilk turlardan birinci yeri gözləmirdim”
Bu sözləri Korner.az-a açıqlamasında qadın şahmatçılardan ibarət əsas yığmamızın üzvü və 42-ci Şahmat Olimpiadasında öz lövhəsinin ən güclüsü olaraq qızl medal qazanan Gülnar Məmmədova deyib.
Təcrübəli şahmatçı əməkdaşımızın suallarını cavablandırıb:
– Uğurunuzun sirri?
– Olimpiadanın açılış mərasimindən öncə cənab prezidentimiz İlham Əliyevin bizi qəbul etməsi komandaya əlavə güc verdi. Çünki, çox istəyərdik ki, komanda olaraq “ilk üçlüy”ə daxil olaq və prezidentimiz bizi yenidən qəbul etsin. Uğurumuzda əsas pay sahiblərindən biri də Azerbaycan Şahmat Federasiyasıdı. Onların rolu danılmazdır. Komandamızın adından federasiyanın prezidenti Elman Rüstəmov başda olmaqla, vitse-prezidentlər Mahir Məmmədov və Faiq Həsənova öz təşəkkürümü bildirirəm. Bizə yarış qabağı çox dəstək oldular. Komandanın kapitanı Fikrət Sideifzadə və məşqçi Landa Konstantinə xüsusi təşəkkür edirəm. Onlar olimpiada zamanı da bizi rəqiblərlə partiyalara hazırlaşdırırdılar.
– Qadın komandamız gözləniləndən daha yaxşı çıxış etdi. İlk turlardan yaxşı nəticələr oldu. Təssüf ki, bunun davamı gəlmədi. Sizcə medal şanslarımızı itirməyə səbəb olan əsas həlledici oyunlar hansı oldu?
– Bəli, çox inamla başlamışdıq. Biz Çin və Ukraynaya uduzandan sonra medal şanslarını itirdik. Mənim medal qazanmağım üçün uduzmamağım vacib idi. Yəni bütün oyunları bir növ həlledici saymaq olar.
– Komandanın digər üzvlərindən reytinqdə bir qədər aşağı olan Zeynəb Məmmədyarova birinci lövhədə yarışırdı. Son Azərbaycan çempionu Nərmin Kazımova isə sonuncu lövhədə. Sizcə cütlənmələr bir az fərqli olsaydı, daha yaxşı nəticə qazanmaq olardımı?
– Zeynəb çox təcrübəli şahmatçıdır. Birinci lövhədə onun oynamağı lazım idi.
– Yəni lövhə qərarlarını optimal hesab edirsiz…
– Mən bir az lövhəni başqa cür düşünürdüm. Bunu deməyəcəm. Ancaq bu qərar bizim məşqçilərimizin qərarı idi. Ancaq dediyim kimi, Zeynəbi birinci lövhədə görürdüm.
– Qadın komandamızdan üçüncü yığma olimpiadanı ikincidən əlavə göstəricilərə görə daha yüksək pillədə bitirdi. Bu haqda nə deyə bilərsiz?
– Üçüncü komanda çox yaxşı çıxış etdi .Bu münasibətlə komandanın kapitanı Rəsul İbrahimovu təbrik edirəm. Eyni zamanda kişilərdən ibarət milli komanda da öz kateqoriyasında birinci oldu. Azər Mirzəyevi də təbrik edirəm. İkinci komandamız güclü komandalarla oynamışdı. Nərmin Xələfova və Ülviyyə Fətəliyeva WGM (Woman Grandmaster – qadın qrossmeyster) normasını yığmışdılar. Onları təbrik edirəm.Ümumilikde komanda da çox yaxşı oynadı. Sonuncu tur qalib gəlsəydilər, 10-15-ci pillələri bölüşdürəcəkdilər.
Müsahibə AFFA yanında Media Komitəsinin maliyyələşdirdiyi layihə çərçivəsində işıqlandırılır
