“Azərbaycanda işlədiyim müddətdən sonra “Futbol arenası” verilişində olmağım gündəmə gəldi və mən də bunu yaxşı tərəfdən dəyələndirmək istəyirəm”.
Korner.az-ın məlumatına görə, bu sözləri “Xəzər Lənkəran”ın sabiq baş məşqçisi Oğuz Çətin deyib. Türkiyəli çalışdırıcı cənub klubundan ayrıldıqdan sonra ölkəsinin “TRT Spor” kanalının “Futbol arenası” verilişində daimi ekspert vəzifəsində işləyəcək.
51 yaşlı mütəxəssis canlı yayımda Azərbaycan və “Xəzər Lənkəran”la bağlı fikirlərini bildirib: “Həmçinin sizlə, Ərman Toroğlu ilə birgə burada olmaq da çox gözəldi. Azərbaycanda 1 il çalışdım. Bunun yarım ilini “Xəzər Lənkəran”da Mustafa Dənizlinin köməkçisi vəzifəsində işlədim. Qalan müddətdə isə komandanı tək çalışdırdım. Orada çox dəyərli insanlarla işlədim. Əvvəlcə Mustafa hoca ilə Azərbaycanda çox önəmli işlər gördük. Ən əsası isə komandanın prezidenti Mais Mənsimov və vitse-prezident Tuyqun Nadirovun böyük dəstəkləri sayəsində hazırlıqlara davam etdim. “Xəzər Lənkəran”da çox əla ab-hava var. Lakin son günlər komandanın strategiyasındakı dəyişikliklərə görə bir qərara gəlib, klubdan ayrıldım. Ancaq Azərbaycan deyəndə, oradakı bir çox xatirələri daşıyaraq ayrıldım. Hər kəsə təşəkkür etmək istəyirəm”.
