Ölkəmizi Avropa Liqasında təmsil edən “Qarabağ”ın qrupdakı çətin durumda olmasına ölkə çempionatındakı rəqibi olan “Xəzər Lənkəran”ın baş məşqçisi Oğuz Çətin münasibət bildirib:
Korner.az-ın futbol11-ə istinadən məlumatına görə, türkiyəli çalışdırıcı “Qarabağ”ın “Sent Etyen”i məğlub etməli olduğunu deyib.
“Qurban hocanı və “Qarabağ”ı son dərəcə təqdir edirəm. Hər zaman da bunu dilə gətirirəm. Onların Avropada oynadığı bütün oyunları dörd gözlə izləyirəm və çox istəyirəm ki, uğur qazansınlar. Amma, bir reallıq var ki, Avropada, UEFA-da oynamaq çox çətindir. Rəqiblər çox güclüdür. Mən heç vaxt çempionatda bildiyim “Qarabağ”ın oyununu Avropada görmədim. Çünki Avropada çempionatdakı kimi oynaya bilməzsən. Fərqli mübarizə aparmaq lazımdır. Son dərəcə də yaxşı təmsil edirlər. Amma ötən il “Qarabağ” fərqli mübarizə aparardı. Topa hakimiyyəti daha yaxşı idi, qol vəziyyətlərini daha yaxşı yaradırdı. Bu il etibarı ilə bunu tam oturuşmuş deyə bilmərəm. Ötən illə müqayisədə indi zəifdir. Böyük potensiallarının hər zaman olduğu isə bir reallıqdır. “Dnepr”ə Bakıda məğlub olmaları hər şeyi çətinləşdirdi. Çünki, burada qalib gəlsəydi, “Sent Etyen”lə heç-heçə oynayıb, bu işi bitirə bilərdi. Hətta, “Dnepr”lə heç-heçə etsəydi tur üçün bir rəqibi olacaqdı. İndi iki rəqibi var. Çox çətin vəziyyətdi. Ən önəmli olan səfərdə “Sent Etyen”ə qarşı qələbə əldə etməkdir. Amma, asan olmayacaq. Fransa çempionatının komandasıdır. Bura gətirilən heyətlə oradakı heyət fərqli ola bilər. Qarabağ Avropada komanda müdafiəsini yaxşı edən və qol epizodunu da qısa zamanda yarada bilən komandadır. Buna nail ola bilər. Buradakı ən böyük problemi, bu qədər azarkeş qarşısında futbolçuya nəzarət edə bilməkdir. Buradakı məğlubiyyəti mən biraz da azarkeş amili ilə bağlayıram. Hər kəs qol gözləyir, qol istəyir. Oyunçulara nəzarət baxımından problem yaşana bilir”, – deyə Oğuz Çətin bildirib.
