Bu gün Avroliqanın birinci təsnifat mərhələsi çərçivəsində "Xəzər Lənkəran" səfərdə "Nomme Kalyu"nun qonağı olacaq. Korner.az-ın məlumatına görə, Estoniya təmsilçisi hər vəclə azarkeşləri stadiona dəvət etməyə çalışır. Klubun rəsmi saytında oyunla bağlı yerləşdirilən xəbərin başlığı "Nomme Kalyu" "Qafqazın "Çelsi"sinə qarşı" kimi verilib.
"Nomme Kalyu" klubunun rəsmi saytında "Xəzər Lənkəran"ın sahibi Mübariz Mənsimov haqda məlumat və onun matçı izləyəcəyi qeyd edilib. "Milyarder iş adamı Mənsimov bugünkü matçı izləyəcək" – deyə yazan klubun rəsmi saytı ilk görüşdəki "Xəzər Lənkəran" azarkeşlərinin çılğınlığından yazaraq, eyni atmosferi məhz "Kadriorq" stadionunda öz azarkeşlərinin yaratmasını istəyir.
Yazının sonunda isə: "Lənkəranda 15 min azarkeş matça gəldi və komandalarına dəstək oldu. Siz də gəlin, Qafqazın "Çelsi"sini birgə keçək"- deyə qeyd olunub.