Deyərdim ki, Neftçiyə “antibiotik” vurdular. Bu “dərman”ın xeyri olacaq. Yaddan çıxarmayaq ki, arada vitamin də qəbul etmək lazımdır. Tam səmimi deyirəm, rəhbərliyin dəyişməsi yerinə düşdü. Yazar, ssenarist və rejissorun komandaya gəlişi yaradıcı tərəfdən hər şeyi dəyişəcək. Yaradıcılıq təkcə incəsənətdə olmur. Bilirəm, indi bəziləri başlayacaqlar ki, niyə gedib öz işləriylə məşğul olmurlar? Bax onda adamı gülmək tutacaq.
Amma və lakin çətin olacaq. İndi bütün futbolçular və məşqçilər tezbazar Çingiz Abdullayevin kitablarını oxuyacaqlar (əgər oxuya bilsələr) və müsahibələrində deyəcəklər ki, biz elə çoxdan bu yazıçını oxuyur və sevirik!
Bilirsiz ki, mən də bir futbol klubunda menecer kimi çalışmışam. Nəinki futbola, hətta az qalmışdı kinoya və həyata nifrət edim. Bir məsələni də yaddan çıxarmayaq ki, Çingiz müəllim yetərincə ağıllı və tədbirli adamdır. Onun idarəçilik təcrübəsi bizim bəzi klubların rəhbərlərindən çox üstündür. Yəqin ki, ətrafına savadsız və səviyyəsiz adamları yığmaz. Ən azı, ayda bir dəfə kitab üzü açanlarla işləyəcək.
A.P.Çexovun “Məmurun ölümü” hekayəsindəki kimi, “bağışlayın” – deməkdən adam yorulur. Məncə, biz tamaşaçılar Çingiz və Bəhram müəllimə bağışlayın deməliyik ki, sizləri işinizdən ayırıb bəlaya saldıq. Axı özlərini futbol “bilicisi və komandanı məndən “çox istəyirsən?” deyənlər Sizi yaradıcılıqdan ayırdılar. İnanaq ki, kinodan və ədəbiyyatdan birdəfəlik ayrılmamısız. O yolda mən də iki il əvvəl yürüdüm. Amma və lakin mən sonda gedib uzaq bir səhraya möhkəm qışqırdım. İstəyirəm sizlər mənim kimi əsəbdən yox, “Neftçi”nin qol vurmasına və çempionluq sevincinə qışqırasız. Sonda bir xahişim var sizlərdən. Qəti olaraq “sizi yazar kimi sevirəm” deyənlərdən özünüzü qoruyun, bir də ətrafınızda, hər halda, bir-iki futbol "biliciləri" olacaq yəqin. Onlara diqqətlə qulaq asıb öz bildiyinizi edin. Qalanları düzələcək. Uğur olsun!
Bir sualım var oxuculara: "Neftçi"ni boş verin, özünüz necəsiz?
Tahir Əliyev
kinorejissor
