Azad menecer Rəsul Şükürsoy “Neftçi”nin vitse-prezidenti Tahir Süleymanovun Korner.az-a müsahibəsində səsləndirdiyi fikirlərə münasibət bildirib.
Şükürsoyun cavabını nöqtə-vergülünə toxunmadan diqqətinizə çatdırırıq:
“Tahir Süleymanov yenə də diktafon görəndə özündən asılı olmayan instinktinə tabe olub: çoxlu yalan danışıb. Məsələnin əslini “Hoverla” tərəfindən, birbaşa Qroznı ilə ünsiyyətdə olan Elsevər Paşayevdən və ya elə Qroznının özündən öyrənə bilərsiniz. Populist çıxışları illərdi “Neftçi” və konkret klubun vitse-prezidenti Tahir Süleymanov edir. Onlar bu qədər uğursuzluğun ardından borcları olan anım günündə bir dəqiqəlik sükut elan edilməsini də “piar” kimi gözə soxurlarsa, onda mənəviyyatdan çox danışmasınlar. Süleymanov yazdıqları sonuncu məktubla İmamverdiyev məsələsinin qapadıldığını yaxşı bilirdi və o cür məktubu yazdırdı, göndərdi. İndi nağıl yox, ortada olan faktdan danışmaq lazımdı. Cavid İmamverdiyevi “Hoverla” üçün “Neftçi”dəki çıxışı, uğurları maraqlı etməyib. Bilmək istəyirsinizsə, ümumiyyətlə, bir Ukrayna Premyer Liqa klubu üçün azərbaycanlı futbolçu maraqsızdı. Onu maraqlı edən Elsevər Paşayevin təqdimatıdı, Qroznı ilə münasibətləri idi. Ukrayna tərəfi bu məsələnin həlli üçün Artur Yedigəryan kimi Ermənistan yığmasının futbolçunusu da yola salıb jest etmişdi. Ona görə ki, “Neftçi”dən danışanda bizimkilər ağzını doldurub “xalq komandası” ifadəsini işlədir. Azərbaycan futbolunun, xalqa məxsus olan dəyərin inkişafı Avropada oyun almaq deyil, Avropaya futbolçu verməkdi. Ola bilər, Süleymanov bundan sonra mənim acığıma özü əlaqə saxlayıb “Hoverla”ya İmamverdiyevi göndərə bilər. Ancaq mən dəqiq bilirəm ki, Tahir bəyin “peşəkarlığı ” sayəsində Ukrayna klubu üçün bu məsələ qapanıb. Və təbii ki, Ukraynadan heç kim Süleymanov həzrətlərinin ayağına gəlməyəcək”.
