"Neftçi"nin vitse-prezidenti Tahir Süleymanovun Korner.az saytına müsahibəsi
– "Simurq"la səfər oyununuz canlı yayımlanmayacaq. "Neftçi"nin son günlər yaşadıqlarının ardından bu matçın canlı yayımlanmaması sizdə, klubda hər hansı şübhə doğurmur?
– Bizim üçün də maraqlıdı ki, çempionatın lideri olan "Neftçi"nin səfər matçı niyə canlı yayımlanmır. "İlk altılıq"dakı bütün oyunlar canlı yayımlanır. Lakin bizim Zaqataladakı oyunumuz niyə ekrandan, ictimaiyyətdən niyə gizlədilir? Bu, doğurdan da, maraqlı məqamdı. Bilirsiz ki, klublar yayım hüququnu PFL-ə verib. Onlar bu məsələyə aydınlıq gətirə bilərlər. Görünən budur ki, bizim azarkeşlərin haqqı tapdalanır. Bizə də, maraqlıdır ki, bütün bu olaylardan sonra "Simurq" – "Neftçi" oyunu niyə ekranlara daşınmır? Səbəb nədi?
– Hakimlər Komitəsinin sədri Xaqani Məmmədov verdiyi açıqlamada Böyükağa Hacıyevin 10 oyunluq cəzalanmasında bilavasitə sizi günahkar hesab edir. Buna münasibətinizi bilmək istərdim.
– Böyükağa Hacıyev ağsaqqal adamdı. Onu kimsə təhrik edə bilməz. İkincisi, Tahir Süleymanov sözünün arxasındadı. Bizi başqaları ilə səhv salmasınlar. Mən Xaqani Məmmədovla danışmışam. O deyib ki, mən belə bir açıqlama verməmişəm.
– Son iki ilin çempionu, Avropa Liqasında tarix yazan "Neftçi"yə qarşı bu cür təziqlərin olmasının səbəbi nədi? Nəyə görə "Neftçi" bu cür olaylarla üz-üzə qalıb?
– Sizə bir fakt deyəcəm. Kanales Azərbaycan çempionatları tarixinə ən çox qol vuran futbolçu kimi düşüb. Ancaq bu gün FİFA-nın açıqladığı reytinqdə milli komandamız Tacikistandan geri düşüb. Biz futbola qulluq edirik. Bir olmaq lazımdı ki, futbol inkişaf etsin. Ancaq görürük ki, günü-gündən klubumuza qarşı təziqlər artır. Bundan əlavə, "Simurq"la oyunumuzda canlı yayımlanmır. Bütün bu suallara oyundan sonra aydınlıq gələcək.
– Bütün suallar deyərkən, nəyi nəzərdə tutursuz?
– Biz mövqeyimizi ortaya qoymuşuq. Sizin sualınıza qarşılıq olaraq bu cavabı verirəm. Hər şey göz qabağındadı. Hansısa şərhə ehtiyac varmı?
– Bu cür olaylar azarkeşlərdən, mediadan gizlətdikcə fikirləşmirsiz ki, “Neftçi”yə qarşı təzyiqlər daha da artacaq?
– Biz bu klubun başına keçəndə verdiyimiz uğurlu vdləri yerinə yetirdik. İstəyimiz "Neftçi"yə qarşı olan bu cür halların bir daha baş verməməsidi. Bizdən əl çəkmələrini istəyirik.
– İntizam Komitəsinin verdiyi sərt cəzalardan sonra Ramin Musayev və ya Elxan Məmmədovla hər hansı söhbətiniz olubmu?
– Elə yarım saat bundan öncə Elxan Məmmədovla danışdım. Biz öz haqqımızı sonadək istəyəcəyik. Biz öz mövqeyimizi ortaya qoymuşuq.
– Gizli deyilsə, nə söhbətiniz oldu AFFA-nın baş katibi ilə?
– Bizim istəyimiz odur ki, AFFA İntizam Komitəsinin çıxardığı qərarlarla bağlı verdiyimiz apellyasiya şikatəyinə bu gün baxılsın. Lakin bu baş tutmadı. Elxan Məmmədov ölkə xaricindədi və gələndən sonra bu məsələlərin müzakirəsi davam etdiriləcək.
– Apellyasiya şikatəyinizə bu gün baxılmamasının səbəbi nədi?
– Federasiyanın hüquqşünası ilə danışığımız olmuşdu ki, bu gün saat 11:00-da məsələyə baxılsın. Təəssüf, bizə bildirdilər ki, Apellyasiya Komitəsinin üzvlərini bir yerə yığmaqda çətinlik çəkirlər.
Səxavət QURBANOV
