Adı bir müddətdir ki, “Neftçi” ilə birgə çəkilən və hətta “ağ-qaralar”ın heyətinə qatmaq istədiyi Ernest Nfor problemlə üzləşib.
Korner.az-ın məlumatına görə, Belçikanın “Kortriyk” klubu ilə problemini həll etməyə sözügeən ölkəyə gedən Nfor Patrik Turkla məsələni müzakirə edərkən, qalmaqal yaranıb. İstəyinin qarşı tərəfdən müsbət qarşılanmadığını görən futbolçu baş direktora qarşı zor tətbiq edib.
Bundan sonra klubun baş direktoru Patrik Turk və baş məşqçisi Heyn Vanhazebruk kamerunlu hücumçudan polisə şikayət edib.
Patrik Turk bununla bağlı açıqlamasında bunları deyib: “Nforu “Neftçi” ilə yanaşı, “Bergen” və “Vaasland-Beveren” də istəyir. Onlar hətta bu futbolçuya görə tələb etdiyimiz transfer məbləğini (250 min avro) də ödəməyə hazır idilər. Amma Nfor özü “Neftçi”yə keçmək istədiyini dedi. Görünür orda ona daha çox pul təklif edirlər. “Neftçi” isə heç bu transfer məbləğinin yarısını da ödəmək istəmir. Mən Ernestə sakitcə başa salmağa çalışdım ki, öz klubunun maraqlarını qoruması vacibdi. Amma o, mənə hücum etdi və dava düşdü. Mən də qorunmalı oldum. İki əməkdaşımız olaya müdaxilə etdi, onu otaqdan çıxardılar. O, mənimlə yanaşı, baş məşqçimiz Heyni və ailəsini də ölümlə hədələyib. Bu üzdən də biz polisə müraciət etməli olduq və şikayətimiz qəbul olundu”.
Məsələylə bağlı futbolçu özü də açıqlama verib: “Bu, sadəcə onların oynadığı «oyunun» bir tərkib hissəsidi. Mənim vəkilimin klubla görüşü olacaq. Baxaq, görək nə olur”.
Qeyd edək ki, Nfor bir müddət öncə “Neftçi”də baxışda olub və bəyənilib. Sadəcə klubu ilə müqaviləsi qalan futbolçuya problemi özü həll etməsi “Neftçi” dən tapşırılıb.
