“Neftçi”nin sabiq rəisi Güloğlan Cabbarov növbəti dəfə Azərbaycan futbolu barədə fikirlərini açıqlayıb.
Korner.az-ın məlumatına görə, Cabbarov öz şəxsi “facebook” hesabı vasitəsilə bu fikirləri səsləndirib:
“Hamı çox gözəl bilir ki, “Sumqayıt” Elxan Məmmədovun idarəçiliyi altındadır və bu kluba ildə 4 milyon manat ayrılır. Bununla yanaşı, böyük ölçüdə pullar silinir və yeyilir. Amma “Rəvan” özü özünü maliyyələşdirir. Belə olan halda, “Rəvan”ın elitadan haqsız yolla və qəsb edilərək çıxarılması dövlətin malına, puluna xəyanətdən başqa bir şey deyil.
Bu gün futbol aləmi istəyir ki, Azərbaycanda 18 klub olsun. Sumqayıt, Gəncə və Tovuz təmsilçilərinin də bu liqada oynaması hər birimizin arzusudur. Amma sponsor yoxdur. Liqanın bitməsinə iki həftə qalmış “Qarabağ” kimi çempion klubun da “Sumqayıt”a qardaş kimi 3 xal pay verməsi bu liqanın çox səviyyəsiz və ədalətsiz olduğunu göstərir”.
