“Neftçi”nin təlim məşq bazasında klubun Müşahidə Şurasının növbəti iclası keçirilib.
Korner.az-ın klubun saytına istinadən verdiyi xəbərə görə, görüşdə şura üzvlərinə ilk iclasda qəbul olunmuş qərarların icrasına dair hesabat təqdim olunub və gündəlikdə olan məsələlər müzakirə edilib:
1. “Neftçi”nin yeni strukturu və iş sisteminə uyğun olaraq hazırlanmış ştat cədvəli Müşahidə Şurası tərəfindən təsdiq olunub.
2. “Neftçi”nin rəsmi loqotipinin yenilənməsi ilə bağlı ictimaiyyətdə, azarkeşlər arasında keçirilmiş sorğunun nəticələri Müşahidə Şurasına təqdim olunub. Sorğuya əsasən hazırki loqotipin saxlanmasının leyhinə fikir bildirən azarkeşlərin rəy çoxluğu nəzərə alınaraq hazırki loqotipin saxlanmasına qərar verilib.
3. İclasda şura üzvlərinə yeni yaradılacaq “Neftçi”nin muzeyinin layihəsi təqdim edilib və layihəyə əsasən muzeyin “Bakcell Arena”da təsis edilməsinə qərar verilib.
4. “Neftçi”nin iqtisadi baxımdan səmərəli şəkildə fəaliyyət göstərə biləcək “Fan shop”unun təsis edilməsi ilə bağlı AFFA ilə əməkdaşlıq məsələsi müzakirə olunub. İlkin olaraq əldə edilmiş razılığa əsasən əlavə xərclərin aradan qaldırılması məqsədi ilə “Neftçi”nin məhsullarının milli komandaların rəsmi “Fan shop” məntəqələrində satışa çıxarılması səmərəli hesab edilib.
5. İclasda Azərbaycan Kubokunun final oyunu – “Qarabağ” – “Neftçi” matçına hazırlıq məsələləri müzakirə edilib.
6. İclasda “Neftçi”nin əsas komandası yeni mövsümə hazırlıq məsələsi müzakirə olunub. Təqdim olunmuş təqvim planına əsasən komandanın yay təlim-məşq prosesinin 17-28 iyun tarixləri aralığında Avstriyada təşkil olunması və toplanış çərçivəsində 3 yoxlama oyunu keçirməsi təsdiqlənib. Hazırlıq planına əsasən “Neftçi” UEFA Avropa Liqasının iyunun 22-də baş tutacaq püşkatmasının nəticəsindən asılı olaraq Bakıya, yaxud rəqib klubun təmsil olunduğu ölkəyə səfər edəcək.
7. İclasda klubun inkişaf strategiyasının hazırlanaraq Müşahidə Şurasına təqdim edilməsi ilə bağlı qərar qəbul edilib.
8. İclasda klubun transfer siyasəti, seleksiya prosesi, eləcə də gündəlikdə olan cari məsələlər müzakirə edilib.
