“Neftçi” futbol komandasının məşqçisi fəxri ada layiq görülüb. Korner.az-ın məlumatına görə, 2005-ci ildən komandada kollektivdə məşqçi kimi çalışan İsmayıl Hüseynova “Əməkdar məşqçi” adı verilib. İ.Hüseynov klubun rəsmi saytına açıqlamasında bir çox komandada məşqçi kimi fəaliyyət göstərdiyini, amma “Neftçi”də uşaq futboluna göstərilən qayğını heç yerdə görmədiyini söyləyib: “Klub prezidenti Sadıq Sadıqov uşaq futboluna böyük diqqət və qayğı göstərir. Məhz bu qayğının sayəsində hazırda “Neftçi”də bir çox perspektivli yeniyetmələr top qovur. “Neftçi”də yeni istedadlı futbolçuların yetişdirilməsi və üzə çıxması üçün bundan sonra da böyük səylə çalışacağam. Həyatını idmana həsr edən insanları daim diqqətdə saxlayan ölkə prezidentinə, Gənclər və İdman Nazirliyinə və “Neftçi” rəhbərliyinə dərin təşəkkürümü bildirirəm”.
Qeyd edək ki, İ.Hüseynov məşqçilik karyerasına Rusiyada “Dinamo” (Murmansk) komandasında başlayıb. O, 2005-ci ildən “Neftçi”də uşaqlara futbolun sirlərini öyrədir.
