Bu gün Avropa Liqasının qrup mərhələsinin üçüncü turunda Kazanda “Rubin”lə üz-üzə gələcək “Neftçi”nin idman direktoru Güloğlan Cabbarov çətin sınaq öncəsi Korner.az-a müsahibə verib.
– Oyun öncəsi sizin də fikirlərinizi bilmək maraqlı olardı. Düşərgədə əhval-ruhiyyə necədir?
– Bura qələbə dalınca gəlmişik, rəqibdən də çəkinəcəyimiz yoxdur. Komanda da motivasiya yüksək səviyyədədir, sabah hamımız bunun şahidi olacağıq. 1-2 zədəli futbolçunu çıxmaq şərtiylə, heç bir problemimiz yoxdur. Tam gücümüzlə bu oyuna köklənmişik.
– Bu saata qədər hansısa problemlə üzləşməmisiniz ki?
– Heç bir problem yoxdur, hər şey qaydasındadır. Yalnız oyunu düşünürük. Yenə deyirəm, bura qələbə dalınca gəlmişik. Nəinki bura, “İnter”lə oyuna getsək də, bu sözü deyəcəyəm. Baxmayaraq ki, bu, idmandı, burda qalib tərəf də olur, məğlub tərəf də. Heç-heçəyə gəlincə, açığı şəxsən mənim fikrimcə, heç-heçə bizim işimizə yaramır. Burdan qələbə ilə dönməliyik ki, “Rubin”lə xallarımız bərabərləşsin və növbəti mərhələ şansımız artsın.
– Sizcə, Cavid İmamverdiyevin yoxluğu bu oyunda özünü göstərəcək?
– Cavid olsa daha yaxşı olardı, amma o demək deyil ki, Cavid yoxdursa, ounumuz alınmayacaq. Elə “İnter”lə oyunda meydançaya çıxan Mirhüseyn Seyidov özünü ən yaxşı tərəfdən göstərdi. Sadəcə oyuna tam köklənmiş, istəkli şəkildə çıxmaq lazımdır. Mən özüm də APOEL-lə oyunda olduğu kimi, futbolçularımızda bu inamı görürəm.
– Azarkeş sarıdan problemimiz olmayacaq ki? Ümumiyyətlə, diaspor ilə bu haqda söhbətiniz olubmu?
– Bəli, artıq Tatarıstandakı diasporumuzın rəhbəri Natiq Abdullayevlə görüşümüz oldub. Sağ olsunlar bizi qonaq dəvət etdilər, oturduq, söhbət elədik. Bizə bildirdi ki, “Neftçi”ni çox böyük azarkeş kütləsi dəstəkləyəcək.
– Təxminən nə qədər azarkeşin “Neftçi”ni dəstəkləyəcəyini gözləmək olar?
– Bizə deyilənə görə, təxminən 3-5 min arası azərbaycanlı azarkeşin stadiona gələcəyi gözlənilir.
– Hava limanında Julios Vobayla bağlı yaşanan problemə münasibətinizi öyrənərdik. Nə baş vermişdi, problem nədən ibarət idi?
– İnanmıram ki, futbolçunun sənədində hansısa problem olsun. Sadəcə, Rusiyadı da, burada həmişə belə hallar yaşanır.
Saleh Arslan
KAZAN
