Futbol üzrə Azərbaycan I Divizionunda mübarizə aparan "Bakılı"nın gənc yarımmüdafiəçisi Orxan Müzəffərlinin Korner.az-a müsahibəsi.
– İlk olaraq özünü təqdim et.
Mən, Orxan Müzəffərli 1992-ci il iyunun 22-də Bakıda dünyaya göz açmışam.
– Futbola gəlişin necə olub?
Məhəllədə oynaya-oynaya futbolun sirlərini öyrənməyə başlamışam. İlk dəfə "Azəri" futbol məktəbinə getmişəm. Ondan sonra "Neftçi"yə keçmişəm. "Neftçi"də 2009-2010-cu illərdə 17 yaşlılar üzrə Azərbaycan çempionu olmuşam. Daha sonra "Bakı"nın əvəzedici heyətinə gəlmişəm. Burada da 2010-2011-ci illərdə çempionluğu bayram etmişəm. Daha sonra isə "Lokomotiv"in formasını geyinmişəm.
– "Bakılı"dan öncəki klubun hansı olub?
AZAL-ın əvəzedicilərində oynamışam.
– Hansı futbolçu kumirin olub?
Zidan.
– Bəs niyə məhz "Bakılı"nı seçdin?
Köhnə futbolçu yoldaşlarım "Bakılı"da oynayırdı. Dedilər ki, gəl, burda oyna, kənarda qalma.
– Hansı Premyer Liqa klubunda çıxış etmək istəyərdin?
"Xəzər Lənkəran"da sevə-sevə oynayardım.
– Niyə məhz "Xəzər Lənkəran"?
Çünki bu komandaya simpatiyam var. Həm də, burada gənc futbolçulara şans verirlər.
– İndiki vəziyyətdə "Bakılı"dan ayrılmağı düşünmürsən?
Burda qalmaq istəmirəm. Çünki "Bakılı" iddiasız klubdu. Mən isə yerimdə saymaq istəmirəm. Öz üzərimdə çalışıb daha da irəli getmək istəyirəm.
– Hədəfin nədi?
Hədəfim Premyer Liqa klublarının formasını geyinib, özümü sübut edərək millinin şərəfini qorumaq.
