Milli komandamız 3 gün öncə Avro-2016-nın seçmə mərhələsindəki 5-ci oyununda, nəhayət ki, Malta üzərində (2:0) ilk qələbəsini qazandı. Bu həmdə millimizin yeni baş məşqçisi xorvat Robert Prosineçkinin ilk ciddi sınağı idi. Qələbə qazanılmasına rəğmən Prosineçkinin “Neftçi”dən heç bir futbolçuya dəvət göndərməmisi, eləcə də Premyer Liqamızın hazırkı bombardiri Nurlan Novruzova dəvət göndərməməsi futbol ictimaiyyətində uzun müddət müzakirə olundu. Bütün bunlarla bağlı futbolumuzun əməkdar məşqçiləri ilə əlaqə saxlayıb, fikirlərini öyrənmək istədik.
Əsgər Abdullayev: “İlk növbədə millimizin qələbəsi münasibəti ilə futbol ictimaiyyəti və Azərbaycan xalqını səmimi qəlbdən təbrik edirəm. 2:0 çox yaxşı nəticədir. Bu böyük bir futbol bayramıdır. Hər bir məşqçi çalışır ki, qələbə,uğur qazansın. Prosineçki də buna nail olmağı bacardı. Bu baxımdan məndə ümid oyatdı. Heyət baxımından baş məşqçi seçimində sərbəstdir. Buna görə də mənim hər hansı şərh verməyim çox da düzgün olmaz. Bunların düzgün olub-olmadığını gələcək göstərəcək. Gəlin, belə deyək baş məşqçinin öz fikri var, heyəti də özü müəyyənləşdirir. Eləcə də uğursuzluğa görə özü məsuliyyət daşıyır”.
Böyükağa Hacıyev: “Ən vacib odur ki, komanda üç xalı götürdü. Bunu alqışlamaq lazımdır. “Neftçi”dən milliyə heç bir futbolçunun dəvət almamasını isə mən çox pis qarşıladım. Bu gün “Neftçi”də elə futbolçular var ki, onların “ölüsü” çoxunun “dirisi”ndən qat-qat yaxşıdır. Bu qələbə hələ heç nə ifadə etmir. Malta siz deyən iddialı rəqiblərdən deyil. Prosineçki gələcək oyunlarda daha ehtiyatlı olmalıdır. Eləcə Nurlan Novruzovla bağlı da mən eyni sözləri deyə bilərəm. Təbii ki, bütün bunlar baş məşqçinin öz işidir, biz buna qarışa bilmərik. Məşqçi seçimində müstəqildir. Ona görə kimləri çağırıb-çağırmamağına biz qarışa bilmərik. Amma yenə də çox uzağa getməyək: o boyda “Neftçi”dən bir nəfər yox idi. Hə, bir də Eddi İsrafilov haqqında bir-iki söz demək istərdim. Oyunda təxminən 10 dəqiqə oldu. Amma hələlik bizim üçün “qaranlıq qutu”dur”.
Ağasəlim Mircavadov: “Qələbə qazandılar, sağ olsunlar, əsas bu idi. Amma oyun planındakı bəzi boşluqlar nəzərə çarpırdı, bunların üzərində işləmək lazımdır. Uşaqlarda həvəs, istək var idi, bu çox yaxşı cəhətdir. Hal-hazırda komanda üzərində çox işləmək lazımdır, bunu məşqçilər də çox gözəl anlayır. İstənilən halda, əsas qələbə idi, o da qazanıldı. Prosineçki haqda indi nəsə fikir söyləməkdə çətinlik çəkirəm. Bir oyuna görə məşqçiyə qiymət verməyi düzgün hesab etmirəm. Heyətlə bağlı məsələlər məşqçinin öz işidir, mən ona qarışa bilmərəm. Məşqçinin öz fikri, futbolla bağlı fəlsəfəsi var”.
Ürfan Məmmədzadə
