“Superkubok oyununun keçirilməsini çox istəyirəm. Bununla əlaqədar təşkilatçılıqla bağlı heç bir problem yoxdur”. Korner.az-ın məlumatına görə, bu fikirləri Peşəkar Futbol Liqasının (PFL) prezidenti Ramin Musayev deyib.
İlk milli çempionatlarımızda keçirilən Azərbaycan Superkuboku artıq 17 ildir tarixin yaddaşına köçüb. Halbuki, əksər ölkələrdə mövsüm məhz bu matçla başlanılır. Ölkə çempionu ilə kubokun qalibi öz aralarındakı oyunda kimin güclü olduğunu müəyyənləşdirir.
Saytımız PFL-in yarandığı 4 ildə Superkubok oyununun yenidən keçirilməyini bir neçə dəfə gündəmə gətirib. Musayev həmin matçın baş tutmasını çox istəsə də, problemin olduğunu da bildirdi: “Superkubokun təşkilatçılığı ilə bağlı heç bir problemimiz yoxdur. Əksinə, hər hansı maraqlı oyun keçirilirsə, orada azarkeşlər həzz alırsa, inanın ki, mən bəlkə də 10 qat həmin anı yaşayıram. İstəyərəm ki, Superkubok olsun. Sadəcə, vaxt məhdudiyyəti var. Əgər vaxt imkan verərsə, böyük məmnuniyyətlə bu matçı keçirərik. Çempion “Neftçi” ilə kubokun qalibi “Bakı” arasında Superkubok oyununun keçirilməyi üçün bizə vaxt lazımdır. Bununla bağlı bu yay bir az sıxıntı var. Mən ona görə narahatam ki, söz verərəm, eləyə bilmərik. Əgər vaxt məhdudiyyəti olmazsa, keçiriləcək”.
Hər halda, PFL prezidentinin sözlərinə görə, Superkubokun bərpası ilə bağlı konkret addım atılacaq: “Bütün çətinliklərə baxmayaraq, 21-ci çempionatın sonunda 22-ci çempionatın təqvimini təsdiq edən zamanı Superkubok matçı salınacaq. Yəni gələn ilki çempionatda həmin oyun üçün vaxt ayrılmağı və keçirilməyi ilə bağlı qərar qəbul olunacaq”.
Qeyd edək ki, indiyə kimi ölkəmizdə Superkuboku oyunu 2 dəfə keçirilib. Hər ikisində qalib olan “Neftçi” 1993-cü ildə Bakının “İnşaatçı”, 1995-ci ildə Tovuzun “Turan” klubunu üstələyib. 1994-cü ildə Superkubok isə mövsümü “qızıl dubl”la başa vuran “Qarabağ”a verilib.
apasport.az
