"İstər Elvin istərsə də, Flavinyonun zədəsi şükürlər olsun ki, ciddi deyil".
Bu sözləri Korner.az-a açıqlamasında "Neftçi" klubunun Mətbuat və İctimaiyyətlə Əlaqələr Departamentinin rəhbəri Gündüz Abbaszadə deyib. Dünən ÇL-in II tur ilk matçında "Dalğa Arena"da "Zestafoni" ilə qarşılaşan "Neftçi"nin iki futbolçusu Elvin Yunuszadə və Flavinyo zədələnərək əvəzlənmişdilər.
Futbolçuların son durumları ilə bağlı Abbaszadə bunları bildirdi:
"Elvinin ayağı qıc olmuşdu (damar dartılması). Ancaq elə də ciddi deyildi. Flavinyonun isə Buxarest "Dinamo"su ilə oyundakı zədəsi biraz onu incitdi. Ayağında ağrı hiss edərək əvəzlənməsini istədi. Lakin Flavinyoda da hər şey normaldır. Ancaq onu deyim ki, hesabda öndə idik. Bəlkə də Flavinyo oyunu davam etdirə bilərdi. Biraz arxayınçılığımız oldu və məşqçilər korpusu Flavinyonu riskə atmaq istəmədilər. Yəni bunu mən belə düşünürəm şəxsi fikrimdir. Məhz buna görə də əvəzetmələr oldu. Baş məşqçi Elvin Yunuszadə və Flavinyoya şans verərsə iyul ayının 24-də Tiflisdəki cavab qarşılaşmasında azarkeşlər hər iki futbolçunu meydanda görə biləcək".
