"Neftçi"nin yeniyetmə futbolçulardan ibarət komandası U-16 liqasının bürünc medallarına sahib olub. Korner.az-ın məlumatına görə, klub rəhbərliyi bu münasibətlə komandanın məşqçi heyəti və futbolçuları ilə görüş keçirib.
Görüşdə "Neftçi"nin vitse-prezidenti Tahir Süleymanovla yanaşı, klubun icraçı direktoru Mübariz Xudiyev və 277 saylı idman təmayüllü tam orta məktəbin direktoru Ayaz Süleymanov iştirak ediblər.
Klubun vitse-prezidenti Tahir Süleymanov "Neftçi"nin prezidenti Sadıq Sadıqovun təbrikini futbolçulara çatdırıb. Tahir Süleymanov bu futbolçuların gələcəkdə daha böyük uğurlara imza atacağına əminliyini ifadə edib.
U-16 komandasından 12 futbolçunun təhsil aldığı 277 saylı idman təmayüllü tam orta məktəbin direktoru Ayaz Süleymanov da öz növbəsində yeniyetmələri təbrik edərək onlara idman həyatında nailiyyətlər arzulayıb. Görüşün sonunda futbolçulara medallar və mükafatlar təqdim edilib
