“Neftçi” “Keşlə” ilə oyuna 3 əskiklə hazırlaşır
26.03.2019 , 21:42
“Neftçi” Premyer Liqanın 22-ci turunda qarşılaşacağı “Keşlə” ilə oyuna hazırlığını davam etdirir.
Bu gün doğma bazada baş tutan məşqdə millinin düşərgəsindən qayıtmış futbolçular – Emin Mahmudov, Namiq Ələsgərov, Mirabdulla Abbasov və Ömər Buludov da iştirak ediblər.
Litva ilə yoldaşlıq oyununda 90 dəqiqə meydanda olmuş Səlahət Ağayev və Anton Krivotsyuk bərpa məşqi keçiblər. Toplu çalışmaların və müxtəlif təmrinlərin yerinə yetirildiyi məşqə milli komandaların düşərgəsində olan Kamran İbrahimov, Soni Mustivar və Mamadu Kane qatılmayıblar. Hazırlıq sabah da bir məşqlə davam edəcək.
Martın 30-da “ASK Arena”da keçiriləcək “Keşlə” – “Neftçi” oyunu saat 18:30-da başlanacaq.
