"İnter"in gürcüstanlı hücumçusu Baçana Sxadadzenin klubun rəsmi saytına müsahibəsi
– "Qarabağ"la qarşılaşma çətin və kifayət qədər maraqlı mübarizə şəraitində keçdi…
– Oyun çox yaxşı alındı. Məhz belə matçlar da çempionatı bəzəyir. Düşünürəm ki, hər iki komanda Azərbaycanı avrokuboklarda təmsil etməyə layiqli oyun nümayiş etdirdi. Etiraf edim ki, "Qarabağ"ın oyunu məndə rəğbət doğurur. Bu komandaya qarşı oynamaq həmişə maraqlıdır. Təəssüf ki, biz acınacaqlı qol buraxdıq, ancaq yaxşı ki, cavab qolunu vurmaq bizə müyəssər oldu.
– Matçadək səhhətinizlə bağlı problem vardı. Yüksək temperatura görə bir neçə məşqi buraxmalı olmuşdunuz…
– Səmimi deyim ki, buna görə mən komandayla 6 gün ərzində məşq etmədim. Oyuna bir gün qalmış uşaqlarla birlikdə cəmi bir məşq keçirdim. İdeyaya görə, mən "Qarabağ"la meydana çıxmamalıydım, lakin son anda adımın iştirak vərəsinə salınması qərara alındı. Mənə göstərilən etimada görə məşqçilər heyətinə təşəkkür etmək istəyirəm. Bundan sonra da etimadı doğrultmağa çalışacağam.
– Çempionatın son üç matçında "İnter" üç məğlubiyyətə uğradı, lakin "Qarabağ"la oyunda bu xoşagəlməz seriya qırıldı. Necə düşünürsünüz, bu qarşılaşma komandanın o qədər də yaxşı olmayan psixoloji vəziyyətdən çıxmasına və yenidən öz gücünə inamın artmasına kömək edəcəkmi?
– Nəzərimcə, "Qarabağ"la matçadək biz bu vəziyyətdən çıxmışdıq. Komanda ötən oyunlarda məğlub olmuşdu, amma indi biz yenidən öz gücümüzə inandıq və bu vəziyyət də oynumuzda mütləq müsbət əks olunmalıdır.
– "Neftçi" ilə qarşıdakı matç barədə nə deyə bilərsiniz?
– Düşünürəm ki, "Neftçi" – "İnter" matçının afişası artıq çox şeydən xəbər verir. Bu, hər iki komanda üçün çox vacib oyun olacaq.
