Futbolun kütləviliyi naminə daim fərqli tədbirlər həyata keçirən "Qarabağ" klubu daha bir möhtəşəm layihə həyata keçirib.
Korner.az-ın klubun saytına istinadən verdiyi məlumata görə, ölkənin ən böyük alış-veriş mərkəzlərindən sayılan "Park Bulvar"da klub tərəfindən promo-aksiya keçirilib. Alış-veriş mərkəzində quraşdırılmış "Qarabağ"-a məxsus stenddə Premyer Liqada baş tutacaq "Qarabağ" – "Neftçi" matçı ilə bağlı təbliğat aparılması ilə yanaşı, vətəndaşlara "Qarabağ" aksesuarları qazanma şansı yaradılıb. Belə ki, Ağdam təmsilçisi ilə bağlı bir suala cavab verən şəxs "Qarabağ" – "Neftçi" oyununa bilet əldə etməklə bərabər, "Qarabağ" şərfi, forması, şapkası və s. qazanma şansını saxlayır. `"Qarabağ" klubuna aid fərqli suallara cavab verən şəxslər bu məhsullardan birini əldə etmiş olur.
AVM- də böyük diqqət cəlb edən layihədə "Qarabağ"ın vitse-prezidenti Tahir Gözəl də iştirak edib. Hətta bir suala cavab verərək simvolik olaraq `"Qarabağ`" – "Neftçi" görüşünə bilet də əldə edib.
Qeyd edək ki, dünən axşam saatlarına qədər davam edən layihə bu gün də davam edəcək.
