“İnter”in makedoniyalı yarımmüdafiəçisi Slavço Georgiyevski klubun rəsmi saytına müsahibəsində “Qəbələ” (2:1) ilə keçirilən oyunu şərh edib və digər sualları cavablandırıb.
– “Qəbələ” ilə keçirilən matç çox çətin oldu, ancaq buna baxmayaraq komanda qələbə əldə etməyi bacardı. Bu qarşılaşma barədə fikirlərinizi bilmək istərdik.
– “Qəbələ” çox yaxşı komandadı və bizimlə oyunda güclərini bizə göstərdilər. Lakin düşündüyümüzü həyata keçirə bildik. “İnter” vəziyyətlərindən istifadə etdi və layiqli qələbə qazandı. İkinci hissədə biz yaxşı oynadıq, fasilədən sonra biz qonaqlara hər hansı bir şans vermədik.
– İlk hissənin gedişində “İnter”in baş məşqçisi Kaxaber Sxadadze oyun sxemini dəyişdi. 5 müdafiəçilə oyuna başlayan komanda artıq birinci hissənin gedişində 4 futbolçuyla ənənəvi müdafiə xətt oyununa keçdi. Bilmək istərdik, bu dəyişiklik komandanın oyununa necə təsir göstərdi?
– Hər şey çox sadədi. Bizim baş məşqçimiz var, hansı ki, bizim necə oynamağımıza o qərar verir, oyununun gedişində oyun sxemini dəyişdirir və futbolçular da onun düşündüklərini reallığa çevirməlidirlər. “İnter”in heyətində müxtəlif taktiki sxemlərlə hərəkət etməyi bacaran kifayət qədər məharətli futbolçular var. Ümumilikdə, hesab edirəm ki, biz rəqibdən daha yaxşı görünürdük və layiqli olaraq növbəti üç xalı qazandıq.
– “Xəzər-Lənkəran”la səfər matçından sonra verdiyiniz müsahibələrinizin birində qeyd etmişdiniz ki, rəqib komandanın çalışdırıcısının və oyunçularından birinin KİV-ə dedikləri sözlər sizə müəyyən motivasiya vermişdi. Maraqlıdı, bəs “Qəbələ” ilə matçda sizə motivasiya verən nə oldu?
– Bu dəfə bizə turnir cədvəli motivasiya verdi. Axı indiki vəziyyətdə bizim üçün hər xal vacibdi. Bizə xal toplamaq lazımdı ki, özümüzü daha yaxşı hiss edək. Cari mövsümdə turnir cədvəli çox sıx görünür və belə vəziyyətdə hər qazanılan xalın qiyməti daha böyükdü.
– Artıq gələn turda “İnter”i “Neftçi”lə qarşı çətin oyun gözləyir. İlk dövrədə keçmiş komandanıza qarşı oynaya bilmədiniz, ancaq bu dəfə meydançaya çıxa biləcəksiniz. Bilmək istərdik, çempionatın liderlərinin qarşıdakı oyunu barədə nə düşünürsünüz?
– İndi bizi kiçik istirahət gözləyir. “Qəbələ” ilə çətin matçdan sonra dincəlməliyik, sonra “Neftçi” ilə oyuna hazırlaşmağa başlayacağıq. “Neftçi” ilə matça maksimal dərəcədə konsentrasiyayla yanaşmaq lazımdı. Bu oyun hər iki komanda üçün çox çətin və azarkeşlər üçün çox maraqlı olacaq. Biz növbəti üç xalı qazanmağa çalışacağıq.
