FİFA-nın “Neftçi” klubu ilə sabiq futbolçusu Emil Mpenza arasında yaranan mübahisəli vəziyyətlə bağlı qərar çıxarması təsdiqlənib.
Korner.az-ın məlumatına görə, bu barədə xəbəri paytaxt təmsilçisinin rəsmi saytı yayıb.
Klub rəsmiləri 2012-ci ilin yanvarında təlim-məşq toplantısı zamanı komandanın düşərgəsindən ayrılan belçikalı legionerlə bağlı qərarın hələ 5 ay öncə verildiyini açıqlayıb.
Belə ki, həmin vaxt həm klub, həm futbolçunun şikayət etdiyi FİFA 3 ilə yaxın araşdırdığı məsələylə bağlı yekun qərarını 2015-ci ilin yanvarında verib.
“Neftçi”yə də göndərilən müvafiq qərar 7 bənddən ibarət olub:
1. “Neftçi”nin iddiası qəbul edilməyib.
2. Emil Mpenzanın əks iddiası qismən qəbul olunub.
3. “Neftçi” bu qərarın bildirişini aldıqdan sonra 30 gün ərzində Emil Mpenzaya 80000 (səksən min) ABŞ dolları, eləcə də 5% illik – 30 mart 2012-ci il tarixdən ödənişin həyata keçirildiyi tarixədək, məbləğində qalıq əmək haqqını ödəməlidi.
4. “Neftçi” bu qərarın bildirişini aldıqdan sonra 30 gün ərzində müqavilənin pozulmasına görə Emil Mpenzaya 687500 (altı yüz səksən yeddi min beş yüz) ABŞ dolları məbləğində təzminatı, həmçinin üstəlik 5% illik – 30 mart 2012-ci il tarixdən ödənişin həyata keçirildiyi tarixədək, ödəməlidir.
5. Qeyd olunan məbləğlər təyin olunan müddət ərzində “Neftçi” tərəfindən Emil Mpenza ödənilmədiyi təqdirdə, hazırkı məsələ, tələb olunduqdan sonra, nəzərdən keçirilməsi və formal qərarın verilməsi üçün FİFA-nın İntizam Komitəsinə təqdim olunacaq.
6. Emil Mpenza tərəfindən əlavə iddia qəbul edilməyəcək.
7. Emil Mpenza dərhal “Neftçi”ni ödənişin həyata keçiriləcəyi bank hesabı haqda məlumatlandırmalı və aldığı hər ödəniş haqda FİFA-nın Mübahisəli Məsələlərin Həlli Şurasına xəbər verməlidir.
