"Neftçi" klubunun əvəzedici heyəti iyulun 16-da Gürcüstana yola düşür.
Korner.az-ın klubun rəsmi saytına istinadən verdiyi məlumata görə, “ağ-qaralar” Kobuleti şəhəri yaxınlığındakı Ureki qəsəbəsində təlim-məşq toplanışı keçəcək. İyulun 29-na qədər davam edəcək hazırlıq prosesi çərçivəsində əvəzedicilər 3 yoxlama matçında qüvvəsini sınayacaq. Sınaq qarşılaşmaları iyulun 21, 25 və 28-ə planlaşdırılıb.
Əvəzedici komanda daha sonra Çempionlar Liqasının ikinci təsnifat mərhələsinin cavab oyununda "Neftçi"nin əsas komandasını dəstəkləmək üçün Zestafoniyə yollanacaq.
Qeyd edək ki, "Zestafoni" – "Neftçi" qarşılaşması iyulun 24-də, Bakı vaxtı ilə saat 22:00-da keçiriləcək.