Naxçıvanda seminar
04.11.2022 , 10:30
Naxçıvan Futbol Federasiyasının təşkilatçılığı ilə Futbolun İnkişafı Fondunun icraçı direktoru Tural Piriyev Naxçıvanda seminar keçib.
Korner.az xəbər verir ki, seminarda futbolun inkişafı, klublara dayanıqlı maliyyə mənbələrinin yaradılması və dəstəyin artırılması mövzusuna həsr edilib.
Muxtar respublikada fəaliyyət göstərən futbol klublarının, idman idarələrinin və yerli klublara sponsorluq edən şirkətlərin nümayəndələrinin iştirak ediyi seminarda Naxçıvan Futbol Federasiyasının sədr müavini Sakit Rzayev son illər Naxçıvanda futbolun inkişafı məqsədi ilə həyata keçirilən tədbirləri diqqətə çatdırıb. Qeyd edib ki, Futbolun inkişafı fondu ilə əməkdaşlıq muxtar respublikada futbolun inkişafına yeni nəfəs gətirməklə güclü stimul yaradacaq.
Futbolun İnkişafı Fondunun icraçı direktoru Tural Piriyev təmsil etdiyi qurumun fəaliyyəti barədə iştirakçılara məlumat verib. Bildirilib ki, fondun əsas fəaliyyət istiqaməti regionlarda futbol klublarının inkişafına dəstək vermək, klublara dayanıqlı maliyyə mənbələri tapmaqda kömək etmək, futbol irsinin yaradılmasına nail olmaq, cəmiyyətin futbola olan marağını və inkişaf prosesində onların dəstəyini artırmaqdır.
Seminarda Tural Piriyev iştirakçılara görüləcək işlər, bu sahənin inkişafına təkan verəcək addımlar və dayanıqlı maliyyə mənbələrinin yaradılması yolları barədə iştirakçılara məlumat verib, onları maraqlandıran sualları cavablandırıb.
