Mxitaryan Bakıya gələ bilməməsindən danışdı
19.11.2019 , 11:33
“Roma”da çıxış edən erməni futbolçu Henrix Mxitaryan Avropa Liqasının finalı üçün Bakıya gəlməməsindən danışıb.
Korner.az-ın məlumatına görə, 30 yaşlı yarımmüdafiəçi “Four Four Two”ya müsahibəsində Azərbaycana gedə bilməməsində UEFA-nı günahlandırıb:
“UEFA-nın mənə yeganə köməyi final matçının yerini dəyişmək olardı. Futbolçu və ya komandanın siyasi səbəblərdən yaxşı olmayan yerə getməsi ehtimalı varsa, bunu ora salmaq lazım deyil. Rusiya klubunun Çempionlar Liqasının finalınını Ukraynada keçirməsi çətin olardı. Həyatımın ən vacib anlarını qaçırdım. Bəzi insanlar bunu düşünmədi, müzakirə etmədi. İkinci dəfə komandam final oynamaq şansı qazandı. Ancaq heç birində meydanda olmadım. Bu dəfə final həyəcanı yaşaya bilərdim, təsəvvür edin, həyatında final matçına çıxmamış futbolçuya siyasi problemlər mane olur. Adama pis təsir edir. Demirəm ki, matçın axarını dəyişəcəkdim. Pis olmuşdum, evdə oyuna baxıram, amma heç nə edə bilmirəm. Belə halları digər oyunçuların yaşamasını istəmirəm”.
O, AFFA-nın “Arsenal” – “Çelsi” finalından öncə UEFA-ya təhlükəsizlik təlimatı verməsindən sonra belə Bakıya gəlmədi. Mxitaryan bu məsələyə də münasibət bildirib:
“Borussiya”da “Qəbələ”, “Arsenal”da isə “Qarabağ”la qarşı eyni qrupda düşmüşdük. Səfər qarşılaşmalarında iştirak etməmişdim. Azərbaycana getməyimlə bağlı razılıq olmamışdı. Lakin Avropa Liqasının finalı üçün razılıq oldu. Burada çox detal var. Çox danışmaq istəmirəm. Onlar yalnız Avropa Liqasının finalı üçün təhlükəsizliyə təminat verirdi. İnsanlar çox şey anlamır. Futbol oynamadığım üçün təəssüfləndim. Bu barədə çox danışmayaq”.
