“Mustafinin milli komandaların növbəti toplanışına qədər sıraya dönəcəyinə inanmıram. Nə vaxt hansısa futbolçunun daha az zədələnmə ehtimalı olduğunu düşünürəmsə, onu da itiririk”. Bunu “Arsenal”ın baş məşqçisi Arsen Venger deyib.
“Topçular”ın müdafiəçisi Şkodran Mustafi Almaniya yığmasının heyətində DÇ-2018-in seçmə mərhələsində Azərbaycanla qarşılaşmada (5:1) zədələnərək 6 həftəlik sıradan çıxıb.
Bununla bağlı danışan Venger oyunçusunun ümumiyyətlə bu matçda iştirakına təəccübləndiyini söyləyib:
“Birincisi, Mustafinin Azərbaycanla oyunda meydana çıxacağını gözləmirdim. İkincisi, Almaniya həmin vaxta qədər liderliyi təmin etdiyindən, futbolçunun zədələnəcəyini düşünmürdüm. Üstəlik, ondan bir neçə gün əvvəl Şimali İrlandiya ilə görüşü buraxmışdı. Bu üzdən hansısa sıx qrafikdən, yorğunluqdan danışmaq olmaz. Lakin Mustafi Azərbaycanla matçda iştirak etdi və onu itirdik. Artıq bunlarla mübarizə aparmaq məcburiyyətindəyik”.
